Tennısten Maıamı týrnıri: Býblık pen Kýkýshkınniń kimmen oınaıtyny belgili boldy
NUR-SULTAN. QazAqparat – Maıamıde (AQSh) Miami Open presented by Itaú týrnırinde qazaqstandyqtar Aleksandr Býblık pen Mıhaıl Kýkýshkınniń qarsylastary belgili boldy, dep habarlaıdy QazAqparat tilshisi.
Qazaqstan tennıs federatsııasy málim etkenindeı, elimizdiń birinshi, álemniń 44-raketkasy Aleksandr Býblık jarysty ekinshi aınalymnan bastaıdy.
A.Býblık álemniń 57-raketkasy, serbııalyq Laslo Dere nemese reıtıngte 71-satydaǵy chehııalyq Irjı Veselyıdyń bireýimen kezdesedi.
Álemniń 105-raketkasy M.Kýkýshkın reıtıngte 316-orynda turǵan ulybrıtanııalyq Djek Greıpermen kúsh synasady. Ony jeńse, ekinshi aınalymda jýyrda ótken Dubai Duty Free Tennis Championships týrnıriniń jeńimpazy, keshe reıtıngte 27-orynǵa kóterilgen reseılik Aslan Karatsevpen kortqa shyǵady.
Taǵy bir qazaqstandyq Dmıtrıı Popko irikteý saıystarynda amerıkalyq Born Fratandjelodan 5:7, 2:6 esebimen utylyp qaldy.
Eske sala keteıik, budan buryn qazaqstandyq tennısshilerdiń Maıamı týrnırindegi qarsylastary anyqtalǵanyn jazǵan bolatynbyz.
Áıelder arasynda Qazaqstannan álemniń 89-raketkasy Zarına Dııas birinshi bolyp jarys jolyna shyǵady. Ol reıtıngte ózinen on saty joǵary turǵan amerıkalyq Vınýs Ýılıamspen sheberlik baıqasady.
