Tennısten QR jasóspirimder quramasy álem chempıonatyn 4-orynmen aıaqtady
NUR-SULTAN. QazAqparat - Chehııanyń Prosteev qalasynda tennısten 14 jasqa deıingiler arasynda márege jetken álem chempıonatynda Qazaqstan jasóspirimder quramasy úzdik tórttikke ilikti, dep habarlaıdy QazAqparat tilshisi.
Qazaqstan tennıs federatsııasynan málim etkenindeı, qazaqstandyq jasóspirimder mundaı deńgeıdegi jarysqa alǵash ret qatysqanyna qaramastan, álemdegi úzdik quramalarmen terezesi teń óner kórsetti.
Toptyq básekede álem chempıondary - Italııa quramasyn joldan taıdyryp, shırek fınalǵa shyqty.
Ókinishke qaraı, qola júlde úshin matchta qazaqstandyq jasóspirimder álemniń eki márte eks-chempıony - AQSh quramasyna jol berdi.
Birinshi kezdesýde Damır Jalǵasbaı Djek Kennedıge ese jiberdi - 3:6, 3:6.
Sodan keıin Zańǵar Nurlanuly Kıton Hanseni 6:3, 4:6, 6:2 esebimen tize búktirip, tarazy basyn teńestirdi.
Juptyq synda Danıel Tazabekov pen Damır Jalǵasbaı Kennedı - Hanseden utyldy - 4:6, 3:6.
Osylaısha, Qazaqstan jasóspirimder quramasy (kapıtany Sergeı Kvak) tórtinshi orynǵa taban tiredi.
Birinshilik aıaqtalǵannan keıin Qazaqstan tennıs federatsııasynyń prezıdenti Bolat Ótemuratov qazaqstandyq jas tennısshilerdiń ózderin naǵyz kúresker oıynshy retinde kórsetip, tarıhı nátıjege qol jetkizgenin atap ótti.
Eske sala keteıik, budan buryn tennısten álem chempıonatynda Qazaqstan jasóspirimder quramasynyń qola júldege talasatynyn jazǵan bolatynbyz.
