Tennısten QR Prezıdenti Kýbogy jarysynyń syıaqy qory 225 myń AQSh dollaryn qurady
ASTANA. QazAqparat - Elordada Ulttyq tennıs ortalyǵynda dástúrli «QR Prezıdenti Kýbogy-2014» halyqaralyq týrnıri jalaýyn kóterdi. Ol 27 shildege deıin jalǵasatyn bolady.
Qazaqstan tennıs federatsııasynyń dırektory Dıas Dosqaraevtyń aıtýynsha, 1991 jyldan beri ótip kele jatqan dodanyń halyqaralyq bedeli jyl ótken saıyn artýda jáne búgingi jarysqa 31 elden tennısshiler qatysýǵa nıet tanytqan.
Ulttyq qurama tennısshisi Mıhaıl Kýkýshkın byltyr osy týrnırdiń aqtyq synyna deıin jetken bolatyn. Kýkýshkın bıyl da óz kúshin synap kórmek. Sonymen qatar atalmysh jarysta Qazaqstan namysyn ıÝlııa Pýtıntseva qorǵaýǵa bel býyp otyr. Álemniń úzdik 100 tennısshileriniń qatarynda turǵan Pýtıntsevaǵa munyń aldynda ota jasalǵan. Alaıda ol bıylǵy jarysta joǵary jetistikterge qol jetkizýge nıetti. «Team Kazakhstan» sportshysy Kamıla Kerimbaeva da ulttyq qurama sapynda oıyn kórsetetin bolady. Ol jas ta bolsa, keıingi kezde tamasha óner kórsetip, álemniń úzdik 300 tennısshisiniń qataryna ene aldy.
«Qazaqstan Prezıdenti Kýbogy biz úshin mańyzdy týrnırlerdiń biri, biz oǵan tyńǵylyqty daıyndalýdamyz. Men Astanaǵa juma kúni keldim, týrnırge maqsatty túrde jattyǵýdamyn jáne jeńis jolynda barymdy salamyn», - deıdi M.Kýkýshkın.
D.Dosqaraevtyń aıtýynsha, týrnırdiń jalpy syıaqy qory 225 myń AQSh dollaryn quraıdy.
