Tennısten QR Prezıdenti Kýboginiń júlde qory - 205 myń dollar
ASTANA. QazAqparat - Astanada tennısten Prezıdent Kýbogi jalǵasyp jatyr. Úsh kúnde 30-ǵa jýyq elden kelgen 100-den asa sportshy ózara kezdesip úlgerdi, dep habarlaıdy QazAqparat «Habar 24» arnasyna silteme jasap.
Endi kortqa tek kelesi kezeńge ótkenderi ǵana shyǵady. Qazaqstandyqtar arasynda eń úzdik kórsetkish Tımýr Habıbýllınge tıesili. Ol juptyq synda shırek fınalǵa jetti. Al jekeleı synda Aleksandr Nedovesov pen Anna Danılına búgin kezekti qarsylastarymen jolyǵady. Qalǵan otandyq tennısshiler jarysty alǵashqy aınalymda aıaqtap qoıǵan bolatyn.
Halyqaralyq jarys aldaǵy jeksenbige deıin jalǵasady. Al onyń jalpy júlde qory 205 myń AQSh dollaryn quraıdy.
«Barlyq oıynshylar kelip osy jerde júlde qoryna emes, reıtıngke upaılaryn jınap, aldaǵy álemdik dodalarǵa daıyndyǵyn pysyqtap jatyr. Sondyqtan bizdiń qurama komanda da osy jerge qatysýda», - dedi Qazaqstan tennıs federatsııasy prezıdentiniń orynbasary Dıas Dosqaraev.
