Tennısten QR chempıonaty: 16 jastaǵy tennısshi fınalǵa joldama aldy
NUR-SULTAN. QazAqparat – Elordadaǵy «Dáýlet» sport kombınatynda tennısten ótip jatqan qysqy el chempıonatynda jekeleı synda fınalıster anyqtaldy, dep habarlaıdy QazAqparat tilshisi.
Qazaqstan tennıs federatsııasynan málim etkenindeı, ásirese, «Team Kazakhstan» akademııasynyń túlegi, 16 jastaǵy Arýjan Saǵyndyqova bapkerleri men jankúıerlerin qýantty.
Ol jartylaı fınalda Ýlıana Romanovany 6:4, 6:3 esebimen tize búktirip, óz sporttyq jolynda alǵash ret Qazaqstan birinshiliginiń fınalyna shyqty.
Arýjan altyn júlde úshin 2016 jylǵy el chempıony Gózal Aınıtdınovamen talasady. Ol Janel Rústemovany 6:0, 7:5 esebimen utty.
Erler arasynda fınalda Dostanbek Tashbolatov pen Grıgorıı Lomakın kezdesedi. Dostanbek jartylaı fınalda 15 jasar Erasyl Erdildany 6:0, 6:2 esebimen ońaı jeńdi. Al G.Lomakın taǵy bir jas tennısshi Islam Orynbasardy 6:2, 6:2 esebimen joldan taıdyrdy.
Juptyq synda A.Saǵyndyqova men Sofııa Chýrsına jeńimpaz atandy. Olar Karına Rızvanova men Marııa Sınıtsynany 6:7, 7:6 (9:7), 10:7 esebimen utty.
Erler arasynda D.Tashbolatov pen G.Lomakın Alekseı Kedrıýk pen Rodıon Pakty 6:3, 6:3 esebimen jeńip, juptyq synda úzdik shyqty.
