Tennısten Qazaqstan-Reseı arasyndaǵy kezdesý keıinge shegerildi
ASTANA. QazAqparat - Qazaqstan men Reseı arasyndaǵy tennısten Devıs kýboginiń pleı-off oıyndary keıinge shegerildi. Bul aýa raıynyń qolaısyzdyǵyna baılanysty, dep habarlaıdy «Astana» telearnasy.
Uıymdastyrýshylar Máskeýdegi korttyń ústine arnaıy japqysh tósep, jańbyr sýyn ýaqytyly tazalap otyrǵan. Biraq eńbekteri zaıa ketti. Sınoptıkterdiń jaýyn-shashyn bolady dep boljaǵany dál keldi. Saıystyń bas tóreshisi Andreı Kornılov kort oıyn talaptaryna saı bolmaıynsha, saıys keıinge shegerile beretinin aıtýda.
Kórermenniń de úmiti aqtalmady. Al qazaqstandyq jankúıerler sońyna deıin kútken. Aspan ashylyp, aýa raıy qolaıly bolsa, erteń 3 birdeı kezdesý ótedi dep josparlanýda.
«Keste boıynsha kóptegen oıyndar josparlanyp qoıǵan. Bul jaǵdaı kúntizbege kútpegen ózgerister engizýde. Ońaı bolmaıdy. Biraq bul jerde jeke jetistikterden kóri, ulttyq quramanyń múddesi mańyzdyraq», dedi tennısten ulttyq quramanyń múshesi Mıhaıl Kýkýshkın.
