Tennısten Qazaqstan qysqy chempıonatynyń fınalısteri anyqtaldy
Qazaqstan tennıs federatsııasynan málim etkenindeı, búgin jartylaı fınaldyq matchtar máresine jetti.
Birinshi bolyp kortqa qaraǵandylyq Aryslanbek Aıtqulov pen almatylyq Nıkıta Sıdorov shyqty. Qaraǵandy tennıs mektebiniń túlegi qarqynyn báseńdetpesten 6:2, 6:0 esebimen jeńiske jetti. Sóıtip ol óz sporttyq jolynda alǵash ret eresekter arasynda el birinshiliginiń fınalynda oınaıdy. Onyń qarsylasy – Tımýr Máýlenov. T.Máýlenov tájirıbeli Tımýr Habıbýllındi joldan taıdyrdy – 2:6, 7:6 (7:1), 7:6 (7:3).
Áıelder arasynda elordalyqtar, 14 jasar Arıana Gogýlına men odan bir jasqa úlken Albına Kákenova altyn júldeni sarapqa salady. Arıana jartylaı fınalda Ádemi Amankeldiden aılasyn asyrdy – 6:4, 4:6, 6:0. Al Albına Aııa Myrzaqulovany utty – 7:6 (7:3), 6:4.
Osylaısha, 25 aqpan, senbi kúni Qazaqstan qysqy birinshiliginde jańa chempıondardyń esimi belgili bolady.
Eske sala keteıik, budan buryn Aleksandr Býblıktiń Marsel týrnıriniń shırek fınalyna shyqqanyn jazǵan bolatynbyz.
A.Býblık búgin keshke álemniń 25-raketkasy, bolgarııalyq Grıgor Dımıtrovpen jartylaı fınal joldamasyn sarapqa salady.
