Tennısten Qazaqstan quramasy Devıs kýbogy fınalyna qatysady
NUR-SULTAN. QazAqparat – Tennısten Qazaqstan quramasy 18-24 qarashada Madrıdte ótetin Devıs kýbogy fınalyna qatysady, dep habarlaıdy QazAqparat tilshisi.
Qazaqstan tennıs federatsııasy málim etkendeı, aıtýly dodada álemniń eń úzdik 18 quramasy synǵa túsedi.
Qazaqstan quramasy Ulybrıtanııa jáne Nıderlandy tennısshilerimen bir topta baq synaıdy.
Qazaqstandyqtar 19 qarasha kúni Nıderlandy, 21-inde Ulybrıtanııa quramasymen oınaıdy.
Qurama sapynda Mıhaıl Kýkýshkın, Aleksandr Býblık, Aleksandr Nedovesov, Andreı Golýbev jáne Dmıtrıı Popko bar.
Eske sala keteıik, budan buryn M.Kýkýshkınniń Bratıslava 2 chellendjer týrnıriniń shırek fınalyna shyqqanyn jazǵan bolatynbyz.
M.Kýkýshkın shırek fınalda bosnııalyq Damır Djýmhýrmen kezdesti. Esep 3:6, 1:1 bolǵannan keıin qazaqstandyq tennısshi matchty jalǵastyrýdan bas tartty.
Sol sekildi osy jarysta Andreı Golýbev pen Aleksandr Nedovesov juptyq synda jartylaı fınalǵa deıin jetti. Degenmen jartylaı fınalda chehııalyq Roman Ebavy men slovakııalyq Igor Zelenaıǵa 6:7 (5:7), 4:6 esebimen ese jiberdi.
Taǵy bir qazaqstandyq Dmıtrıı Popko AQSh-taǵy Noksvıll chellendjer týrnırinde slovenııalyq Blaj Roladan 4:6, 4:6 esebimen utylyp, shırek fınalǵa shyǵa almady.
