Tennısten Qazaqstan quramasy alǵash ret Devıs kýbogynyń jartylaı fınalyna shyqty
NUR-SULTAN. QazAqparat – Nıý-Delı (Úndistan) qalasynda Qazaqstan jasóspirimder quramasy óz tarıhynda alǵash ret Juniors Davis Cup (álem chempıonaty) irikteý kezeńiniń jartylaı fınalyna shyqty, dep habarlaıdy QazAqparat tilshisi.
Qazaqstan tennıs federatsııasy málim etkenindeı, qazaqstandyq jasóspirimder shırek fınalda Azııadaǵy myqty quramalardyń biri – Ońtústik Koreıany utty.
Bastapqy oıynda Ámir Omarhanov Koreıanyń úzdik tennısshisin 6:3, 6:4 esebimen jeńip, komandasyn alǵa shyǵardy. Ekinshi básekede Danır Qaldybekov qarsylasyna ese jiberip, tarazy basy teńesti.
Juptyq synda Ámir Omarhanov pen Vıtalıı Zatsepın sheshýshi upaıdy qorjynǵa saldy. Jalpy esep – 2:1.
Erteń qazaqstandyqtar aımaqtyq jarystyń fınalyna shyǵý úshin Úndistan quramasymen talasady.
Іrikteý saıystarynda úzdik shyqqan úsh komanda álem chempıonatyna joldama alady.
Eske sala keteıik, budan buryn Germanııanyń birinshi raketkasy Qazaqstanmen matchtyń qıynǵa túsetini týraly aıtqanyn, Aleksandr Býblıktiń Monte-Karlo masters týrnıriniń úshinshi aınalymyna shyǵa almaǵanyn jazǵan bolatynbyz.
Sondaı-aq Qazaqstan – Germanııa matchynyń jerebesi tartyldy.
