Tennısten Qazaqstan quramasy álemdik reıtıngide 7-orynǵa kóterildi
ASTANA. KAZINFORM — Tennısten áıelder ulttyq quramalarynyń jańartylǵan reıtıngisi jarııalandy.
Astana qalasynda Bıllı Djın Kıng kýbogynyń irikteý matchynda Kanada quramasyn jeńgen Qazaqstan komandasy 9-dan 7-orynǵa kóterildi.
Qazaqstan quramasynyń 2023 jylǵy álem chempıondaryn 3:1 esebimen joldan taıdyryp, qyrkúıek aıynda Qytaıdyń Shenchjen qalasynda ótetin fınaldyq kezeńge joldama alǵany belgili.
Álemdik reıtıngide burynǵysha Italııa kósh bastasa, Ulybrıtanııa ekinshi, Ýkraına 8-den birden 3-satyǵa kóterildi. Odan keıingi oryndarda Ispanııa, Chehııa tur.
AQSh reıtıngide 2-den 6-ǵa, Kanada 4-ten 8-ge deıin quldyrady. Polsha men Japonııa 9-10-satyda.
Eske sala keteıik, budan buryn Bıllı Djın Kıng kýbogynda Qazaqstan quramasynyń fınaldyq kezeńge joldama alǵanyn jazǵan bolatynbyz.
Fınaldyq kezeńde Italııa, Ulybrıtanııa, Ispanııa, Chehııa, Ýkraına, Qazaqstan, Belgııa jáne Qytaı quramalary baq synaıdy.
