Tennısten Qazaqstan chempıonatynyń jeńimpazdary anyqtaldy
NUR-SULTAN. QazAqparat – Elordadaǵy «Dáýlet» sport kombınatynda tennısten Qazaqstan qysqy chempıonaty márege jetti, dep habarlaıdy QazAqparat tilshisi.
Qazaqstan tennıs federatsııasy málim etkenindeı, bir aptaǵa sozylǵan dodaǵa elimizdiń óńirlerinen 100-den astam sportshy qatysyp, baq synady.
Olardyń arasynda bolashaq Qazaqstan juldyzdarymen qatar Alekseı Kedrıýk pen Dmıtrıı Makeev syndy ardagerler de boldy.
Erler arasynda jekeleı synda Dostanbek Tashbolatov pen Grıgorıı Lomakın bas júldeni sarapqa saldy. Bir kún buryn juptyq synda el chempıony atanǵan, birin-biri jaqsy biletin qarsylastar aıanyp qalǵan joq. Birinshi partııa barysynda breık jasaǵan Doshtanbek sol basymdylyqty ýysynan shyǵarǵan joq – 6:4.
Ekinshi partııada esep 5:5 bolǵan mezette dop bergen temirtaýlyq G.Lomakın múlt ketti. Muny sátti paıdalanǵan Shymkent tennısiniń túlegi D.Tashbolatov matchty jeńispen túıindedi – 7:5. Sóıtip ol absolıýtti chempıon atandy.
«Ár kezdesý ońaıǵa tıgen joq. Endi kishkene tynyǵyp alyp, aldaǵy resmı jarystarǵa daıyndalamyn. Sonyń alǵashqysy elde sáýir aıynda ótedi», dedi D.Tashbolatov.
Islam Orynbasardy 6:3, 4:6, 6:1 esebimen tize búktirgen Erasyl Erdilda qola júldege ıe boldy.
Áıelder arasynda fınalda 2016 jyly Qazaqstan qysqy chempıonatynda ozyq shyqqan Gózal Aınıtdınova basym túsetindeı kóringen. Sońǵy básekege deıin birneshe myqty oıynshyny jeńgen ol qarsylastaryna birde-bir set bermegen edi. Al 16 jastaǵy Arýjan Saǵyndyqova ekinshi aınalymda jáne shırek fınalda úsh setke sozylǵan, aýyr jekpe-jekter ótkizdi.
Gózal birinshi partııada basymdylyq kórsetti – 6:3. Ekinshi set basynda da ol alda kele jatty. Alaıda on birinshi geımde sátti oınaǵan Arýjan tarazy basyn teńestirdi. Úshinshi, sheshýshi partııada toǵyzynshy geımde A.Saǵyndyqova breık jasap, jeńisti julyp áketti. Ol bir kún buryn juptyq synda da úzdik shyqqandyqtan, Doshtanbek sııaqty absolıýtti chempıon atandy.
«Fınaldyq báseke óte qıyn boldy. Qarsylasym myqty edi. Men bapkerimniń aıtqanyn túgeldeı oryndadym. Jarys nátıjesine qýanyshtymyn. Ásirese, osy kúnderi qoldaý kórsetken ata-anama rızashylyǵymdy bildirgim keledi», dedi Arýjan jeńisten soń.
Ýlıana Romanovany 6:1, 6:2 esebimen utqan Janel Rústemova úzdik úshtikti túıindedi.
Jeńimpaz-júldegerler kýbok, medal, dıplomnan basqa Qazaqstan tennıs federatsııasynan jarystarǵa qatysýǵa múmkindik beretin granttar aldy. Jekeleı syn jeńimpazdary 5 myń, kúmis júldegerler 3 myń, úshinshi oryn ıelengender 2 myń AQSh dollary kóleminde grantqa qol jetkizdi.
Eske sala keteıik, budan buryn 16 jastaǵy tennısshiniń fınalǵa joldama alǵanyn jazǵan bolatynbyz.
