Tennısten Qazaqstan balalar quramasy Azııa chempıonatynyń fınaldyq kezeńine shyqty

NUR-SULTAN. QazAqparat – Tashkent qalasynda tennısten 12 jasqa deıingiler arasynda Ortalyq Azııa aımaǵynyń komandalyq birinshiligi márege jetti, dep habarlaıdy QazAqparat tilshisi.

Ózbekstan, Qazaqstan, Qyrǵyzstan, Túrikmenstan, Tájikstan jáne Aýǵanstan quramalary eki topqa bólinip, synǵa tústi.

Qazaqstan tennıs federatsııasynan túsken málimetke qaraǵanda, qazaqstandyq uldar óz tobynda Qyrǵyzstan jáne Ózbekstan quramalaryn tize búktirip, birinshi orynǵa ıe boldy.

Qyrǵyzstandyqtarmen matchta qazaqstandyqtar juptyq synda tarazy basyn ózderine aýdardy – 2:1. Ózbekstanmen oıynda da alǵashqy eki básekeden keıin esep 1:1 boldy. Juptyq synda Gıorgı Bregvadze men Robert Kamınskıı sýper taı breıkte jeńisti julyp aldy – 6:7 (5:7), 6:2, 10:2.

Aıqyn basymdylyq kórsetken qyzdar Qyrǵyzstan quramasyn 3:0 esebimen oısyrata utty. Sodan keıin kort ıelerin de jeńdi – 3:0.

Qazaqstan quramasy sapynda myna tennısshiler óner kórsetti:

Uldar:

1. Gıorgı Bregvadze (Atyraý);

2. Robert Kamınskıı (Almaty);

3. Rodıon Traıgel (Qaraǵandy);

Kapıtany Sergeı Kvak.

Qyzdar:

1. Lınara Bólesheva (Almaty);

2. Medına Ótepbergen (Almaty);

3. Polına Barabanova (Qaraǵandy);

Kapıtany Olga Dzıýba.

Osylaısha, irikteý jarysynyń qorytyndysymen Qazaqstan jáne Ózbekstan quramalary bıyl jyl sońynda elordada ótetin Azııa chempıonatynyń fınaldyq kezeńine joldama aldy.

Eske sala keteıik, budan buryn Aleksandr Nedovesovtiń Shtýtgartta Aýstralııa ashyq chempıonatynyń eki jeńimpazyn utqanyn, Mıhaıl Kýkýshkınniń Nottıngem týrnıriniń shırek fınalyna shyqqanyn jazǵan bolatynbyz.

Búgin Eýropa elderinde ótip jatqan halyqaralyq týrnırlerde birneshe qazaqstandyq tennısshi kortqa shyǵady.