Tennısten Qazaqstan áıelder quramasy álemdik reıtıngide úzdik ondyqta tur
ASTANA. QazAqparat – Halyqaralyq tennıs federatsııasy qurama komandalardyń jańartylǵan reıtıngisin jarııa etti, dep habarlaıdy QazAqparat tilshisi.
Qazaqstan tennıs federatsııasynan málim etkenindeı, ulttyq áıelder quramasy álemdik reıtıngide 9-dan 10-orynǵa syrǵyǵanymen, úzdik ondyqta qaldy.
Qazaqstan áıelder quramasy Reseı, Italııa, Rýmynııa, Belgııa, Ulybrıtanııa, Polsha syndy elderdiń aldynda tur.
Qazaqstandyq qyzdar komandalyq álem chempıonaty – Bıllı Djın Kıng kýboginiń fınaldyq kezeńinde óner kórsetip, Ulybrıtanııany utqanymen, Ispanııaǵa jol berip, toptan shyǵa almaı qalǵan bolatyn.
Reıtıng kóshin burynǵysha Aýstralııa bastap keledi.
Billie Jean King Cup reıtıngisiniń úzdik ondyǵyna myna quramalar kiredi:
1. Aýstralııa - 1142;
2. Shveıtsarııa - 1041;
3. Ispanııa - 929;
4. Chehııa - 922;
5. Frantsııa – 910;
6. Kanada - 815;
7. AQSh - 793;
8. Slovakııa - 779;
9. Germanııa - 777;
10. Qazaqstan – 739
Eske sala keteıik, budan buryn Azııa jasóspirimder reıtıngisinde qos qazaqstandyq tennısshiniń kósh bastap turǵanyn jazǵan bolatynbyz.
