Tennısten Indıan-Ýells týrnıri: Rybakına kimdermen kezdesýi múmkin

ASTANA. KAZINFORM — Qazaqstandyq tennısshiler erler men áıelder arasynda ótetin Indıan-Ýells (AQSh) týrnırinde baq synaıdy.

Áıelder arasynda qazaqstandyqtar aldymen álemniń 7-raketkasy Elena Rybakınaǵa úmit artatyny belgili.

Budan eki jyl buryn fınalda álemniń qazirgi 1-raketkasy, Belarýs ókili Arına Sobolenkony 7:6 (13:11), 6:4 esebimen jeńgen E.Rybakınanyń chempıon atanǵany belgili. Ótken jyly osy WTA 1000 jarysyna qatyspaǵan qazaqstandyq tennısshi bıyl jetinshi raketka retinde báıgege qosylady. 

Dodany ekinshi aınalymnan bastaıtyn E.Rybakına álemniń 50-raketkasy, chehııalyq Marııa Boýzkova nemese reıtıngide 64-orynda turǵan nıderlandylyq Sıýzan Lamenstiń qaı jeńgenimen jolyǵady. Sodan keıin sátti órbise, ulybrıtanııalyq Ketı Býlter, reseılik Mırra Andreeva tap kelýi yqtımal.

Ótken aıda Dýbaı (BAÁ) WTA 1000 týrnırinde E.Rybakına jartylaı fınalda dál osy 17 jastaǵy reseılik sportshyǵa ese jibergen bolatyn. Sondaı-aq Indıan-Ýellste aýzymen qus tistegen amerıkalyq Djessıka Pegýla, polıak Iga Shventek jáne A.Sobolenkonyń qaı-qaısysy da chempıondyq ataqtan úmitti. 

Ótken jyly tórtinshi aınalymǵa deıin jetip, I.Shventekke jol bergen ıÝlııa Pýtıntsevaǵa sol reıtıngilik upaıyn qorǵaý ońaıǵa túspeıdi. Osy dúısenbide jańartylǵan reıtıngide TOP-20-ǵa qaıta kirgen, dodanyń 21-raketkasy bolyp tirkelgen ıÝ.Pýtıntseva da ekinshi aınalymnan bastaıdy. Ol álemniń 59-raketkasy, taǵy bir chehııalyq Katerjına Sınıakova nemese irikteý saıysy jeńimpazdarynyń birimen sheberlik baıqasady.

ATP reıtıngisinde sońǵy kezde sátsiz óner kórsetip júrgen Qazaqstannyń birinshi raketkasy Aleksandr Býblık 51-den 82-ge, Aleksandr Shevchenko 95-ten 98-ge syrǵyp ketken bolatyn. Ótken jyly Indıan-Ýells masters týrnırinde Býblık úshinshi, Shevchenko ekinshi aınalymnan asa almaǵan edi. Bıyl sol olqylyqtyń orny tola ma, ony aldaǵy oıyndar kórsetedi. 
Qazaqstandyq tennısshilerden kortqa birinshi bolyp A.Shevchenko shyǵady. Onyń qarsylasy — álemniń 83-raketkasy, japonııalyq Rınkı Hıdjıkata.

A.Býblık irikteý saıysy jeńimpazdarynyń birimen synǵa túsedi.
Taǵy bir qazaqstandyq, álemniń 166-raketkasy Mıhaıl Kýkýshkın irikteý fınalynda reıtıngide 394-satydaǵy ıtalııalyq Djýlıo Zeppıerıge 6:7 (6:8), 2:6 esebimen jol berip, negizgi jarysqa óte almaı qaldy.

Eske sala keteıik, budan buryn Tımofeı Skatovtyń Grekııadaǵy týrnırdiń ekinshi aınalymyna ótkenin jazǵan bolatynbyz.