Tennısten el chempıonaty: Jartylaı fınalǵa kimder ótti
NUR-SULTAN. QazAqparat - «Dáýlet» sport kombınatynda tennısten ótip jatqan Qazaqstan qysqy chempıonatynda jartylaı fınalǵa ótkender belgili boldy, dep habarlaıdy QazAqparat tilshisi.
Qazaqstan tennıs federatsııasy málim etkenindeı, áıelder arasynda birinshi raketka bolyp tirkelgen Arýjan Saǵyndyqova erteń Ýlıana Romanovamen kezdesedi. Olardyń ekeýi de - elordalyqtar.
Al 2016 jylǵy el chempıony, shymkenttik Gózal Aınıtdınova taǵy bir elordalyq Janel Rústemovamen sheberlik baıqasady.
Shırek fınalda G.Aınıtdınova 14 jasar almatylyq Asyljan Arystanbekovany 6:4, 6:4 esebimen utsa, J.Rústemova ótken jylǵy birinshiliktiń kúmis júldegeri, taǵy bir almatylyq Marııa Sınıtsynany 6:1, 7:5-pen joldan taıdyrdy.
Ý.Romanova asa tartysty básekede elordalyq Sandýǵash Kenjebaevany 6:4, 2:6, 6:4 esebimen jeńip ketti. Al A.Saǵyndyqovanyń pavlodarlyq Sofıa Chýrsınamen kezdesýi tipti tartysty boldy. Birinshi sette Arýjan basymdylyq kórsetti - 6:4. Ekinshisinde Sofıa qarymta qaıyrdy - 6:1. Úshinshi, sheshýshi partııada esep 5:2 bolǵan mezette Chýrsına úsh birdeı matchbolyn paıdalana almady. Esesine kúsh alǵan Arýjan budan keıin bet qaratpady - 7:5.
Erler arasynda tosyn nátıje bolǵan joq. Jekeleı synda jartylaı fınalda shymkenttik Dostanbek Tashbolatov qyzylordalyq Ersultan Erdildamen, Nur-Sultan ókili Islam Orynbasar temirtaýlyq Grıgorıı Lomakınmen kortqa shyǵady. Shırek fınalda D.Tashbolatov Nıkıta Sıdorovtyń meselin qaıyrdy - 6:2, 6:3. G.Lomakın de jas tennısshi Maksım Batıýtenkomen kezdesýde qınalǵan joq - 6:3, 6:1. E.Erdilda Jáńgir Almashevti utty - 7:5, 6:2. I.Orynbasar Rodıon Paktan basym tústi - 4:6, 6:4, 6:2.
Eske sala keteıik, budan buryn E.Rybakınanyń Dýbaı týrnıriniń úshinshi aınalymyna shyǵa almaǵanyn jazǵan bolatynbyz.
