Tennısten Devıs jáne Federatsııa kýbogynyń fınaly kelesi jylǵa qaldyryldy
NUR-SULTAN. QazAqparat – Halyqaralyq tennıs federatsııasy (ITF) Devıs jáne Federatsııa kýboginiń fınaldyq kezeńi 2021 jylǵa aýystyrylǵanyn jetkizdi, dep habarlaıdy QazAqparat tilshisi.
Qazaqstan tennıs federatsııasynan alynǵan málimetke qaraǵanda, ITF prezıdenti Devıd Haggertı koronavırýs qaterine baılanysty komandalyq jarystardyń kelesi jylǵa shegerilgenin málimdedi.
Devıs kýbogynyń fınaly bıyl 22-29 qarashada Madrıdte ótýi kerek edi. Endi ol 2021 jyly 22-28 qarashada Madrıdte ótetin boldy. Jarysqa bıylǵy fınalǵa joldama alǵan 18 komanda qatysady.
Madrıdke Qazaqstan erler quramasy da barady. Olardyń bolashaq qarsylastary Shvetsııa men Kanada tennısshileri bolmaq.
Sol sekildi Federatsııa kýbogynyń fınaldyq kezeńi aldaǵy jyly 13-18 sáýirde Býdapeshte ótetin boldy. Buǵan da qazaqstandyq quramanyń qatysýǵa múmkindigi bar. Qazaqstan áıelder quramasy pleı-off matchyn 2021 jylǵy 5-6 aqpan kúnderi Argentına tennısshilerimen ótkizedi.
Bıyl koronavırýs qaterine baılanysty ATP men WTA-nyń barlyq jarystary keıinge qaldyrylǵan bolatyn. Bul dodalar tamyzda ǵana jalǵasýy múmkin.
Eske sala keteıik, budan buryn Dmıtrıı Popkonyń AQSh-taǵy týrnırde bir kúnde úsh jeńiske qol jetkizgenin jazǵan bolatynbyz.
