Tennısten Devıs kýbogynda Qazaqstan quramasy sońǵy matchyn ótkizdi
ASTANA. QazAqparat – Shotlandııanyń Glazgo qalasynda Devıs kýbogy fınaldyq kezeńiniń toptyq básekesi aıaqtaldy, dep habarlaıdy QazAqparat tilshisi.
Qazaqstan quramasy D tobyndaǵy sońǵy matchyn Devıs kýbogynyń on dúrkin chempıony Ulybrıtanııamen ótkizdi.
Qazaqstandyq Dmıtrıı Popko «Úlken dýlyǵa» týrnıriniń úsh dúrkin chempıony, eki márte Olımpıada jeńimpazy Endı Marreıge 4:6, 3:6 esebimen ese jiberse, Aleksandr Býblık Kemeron Norrıdi utty – 6:4, 6:3.
Juptyq básekede Aleksandr Nedovesov pen Aleksandr Býblık álemniń birinshi jáne úshinshi raketkalary Djo Solsberı men Nıl Skýpskıge qatty qarsylyq kórsetti. Úsh set te taı-breıkpen aıaqtalyp, sońǵy sátte ulybrıtanııalyqtar jeńisti julyp aldy – 6:7, 7:6, 6:7.
Jalpy esep – 1:2, Ulybrıtanııa paıdasynda.
Toptyq báseke barysynda Býblık pen Nedovesov álemniń juptyq syndaǵy kóshbasshylary, nıderlandylyqtar Kolhof (4 ATP) pen Mıddelkopty, sondaı-aq amerıkalyqtar Ram (2 ATR) men Sokty jeńdi.
D tobynan Nıderland pen AQSh quramalary shırek fınalǵa shyqty. Endi qazaqstandyq tennısshiler aldaǵy jyldyń aqpanynda kelesi komandalyq álem chempıonatynyń joldamasy úshin talasady. Jerebe qarasha aıynyń aıaǵynda tartylady.
Eske sala keteıik, budan buryn Jibek Qulambaevanyń bıylǵy besinshi tıtýlyna qol jetkizgenin jazǵan bolatynbyz.
Sondaı-aq Elena Rybakına Slovenııadaǵy týrnırdiń fınalynda utylyp qaldy.
