Tennısten Devıs kýbogynda Qazaqstan quramasy ekinshi matchyn ótkizedi

NUR-SULTAN. QazAqparat – Qazaqstan quramasy 15 qyrkúıek kúni Shotlandııanyń Glazgo qalasynda Devıs kýbogynyń toptyq básekesinde AQSh komandasymen kúsh synasady, dep habarlaıdy QazAqparat tilshisi.

Qazaqstan tennıs federatsııasynan málim etkenindeı, bul – qazaqstandyqtardyń D tobyndaǵy ekinshi matchy.

AQSh quramasy Ulybrıtanııamen birge Devıs kýbogy oınatyla bastaǵan 1900 jyldan beri qatysyp keledi. Jarystyń ózi AQSh-tyń alǵashqy quramasynyń oıynshysy Dýaıt Devıstiń esimimen atalady. Amerıkalyqtar Devıs kýbogyn 32 márte jeńip alǵan. Olar ekinshi oryndaǵy aýstralııalyqtardan (28) oq boıy ozyq tur.

Qazaqstandyqtar buǵan deıin Devıs kýbogynda AQSh komandasymen oınap kórgen joq. ATR dodalarynda Aleksandr Býblık amerıkalyq Teılor Frıttspen tórt ret oınap, sonyń úsheýinde basym tústi. Tommı Polmen de tórt ret kezdesip, tek bireýinde ǵana Býblık jeńgen. Djek Sokpen esep teń – 1:1.

Mıhaıl Kýkýshkın Frıttspen úsh básekesinde de qarsylasyna jol bergen. Sol sekildi T.Pol da eki ret Kýkýshkınnen aılasyn asyryp ketken.

Birinshi matchta Qazaqstannyń Nıderland komandasynan jeńilip qalǵany belgili. Sondyqtan búgingi jáne 18 qyrkúıek kúni Ulybrıtanııamen ótetin matchta tek jeńis kerek. Sonda ǵana shırek fınalǵa óte alady.

Qazaqstan – AQSh matchy elorda ýaqytymen saǵat 21:00-de bastalady.

Eske sala keteıik, budan buryn Elena Rybakınanyń Slovenııadaǵy jarystyń shırek fınalyna ótkenin jazǵan bolatynbyz.

Foto: Andreı Ýdartsev