Tennısten Devıs kýbogy: Qazaqstan – Norvegııa matchynda Býblık tarazy basyn teńestirdi
NUR-SULTAN. QazAqparat – Osloda Devıs kýbogynyń irikteý kezeńinde Norvegııa – Qazaqstan matchynda Aleksandr Býblık pen Vıktor Dýrasovıch kortqa shyqty, dep habarlaıdy QazAqparat tilshisi.
A.Býblık Qazaqstannyń birinshi, álemniń 32-raketkasy bolsa, qarsylasy dúnıejúzilik reıtıngte 321-orynda tur.
Birinshi partııada birden oıyn tizginin qolyna alǵan qazaqstandyq tennısshi breıkpen alǵa ketti – 2:0. Osy basymdylyǵyn saqtaı bildi – 6:3.
Ekinshi sette esep 2:2 bolǵan mezette Býblık breık jasaı aldy. Taǵy bir breık – 5:2. Sosyn kezdesýdi eıspen bitirdi – 6:2.
Bir saǵattan sál astam ýaqytqa sozylǵan báseke barysynda Býblık 11 eıs jasap, 3 breıkke qol jetkizdi.
Osylaısha A.Býblık Qazaqstan – Norvegııa matchynda tarazy basyn teńestirdi. Esep – 1:1.
Qalǵan oıyndar 5 naýryz kúni bolady. Úsh jeńiske qol jetkizgen qurama Devıs kýbogynyń fınaldyq kezeńine joldama alady.
Eske sala keteıik, budan buryn Norvegııanyń Qazaqstanmen matchta alǵa shyqqanyn jazǵan bolatynbyz.
