Tennısten Devıs kýbogy: Qazaqstan Nıderlandy komandasymen kezdesedi
NUR-SULTAN. QazAqparat – Búgin Shotlandııanyń Glazgo qalasynda Devıs kýbogynyń toptyq básekesi bastalyp, Qazaqstan quramasy Nıderlandymen kezdesedi, dep habarlaıdy QazAqparat tilshisi.
Qazaqstan tennıs federatsııasynan málim etkenindeı, D tobynda atalǵan eki komandadan basqa AQSh jáne Ulybrıtanııa quramalary óner kórsetedi.
Pleı-off kezeńine úzdik eki komanda joldama alady.
Qazaqstan – Nıderlandy matchynda alǵashqy bolyp komandalardyń ekinshi raketkalary Mıhaıl Kýkýshkın (221 ATR) men Tallon Grıkspýr (48 ATR) kortqa shyǵady. Bul ekeýi buryn ózara oınamaǵan.
Sodan keıin qos quramanyń úzdikteri Aleksandr Býblık (44 ATR) pen Botık van de Zandshýlpqa (35 ATR) kezek keledi. Olar da bir-birimen kortta kezdespegen.
Úshinshi oıynda, ózgeris bolmasa, Andreı Golýbev – Aleksandr Nedovesov juby Matve Mıddelkop – Ýeslı Kolhofpen sheberlik baıqasýy kerek.
Match elorda ýaqytymen saǵat 21.00-de bastalady. Alǵashqy eki kezdesýdi Qazsport telearnasynyń saıtynan kórýge bolady. Úshinshisi tikeleı efırden kórsetiledi.
Eske sala keteıik, budan buryn qazaqstandyq tennısshilerdiń álemdik reıtıngidegi orny belgili bolǵanyn jazǵan edik.
