Tennısten Devıs kýbogy: Qazaqstan quramasy Ońtústik Koreıamen oınaıdy

ASTANA. KAZINFORM – London qalasynda Devıs kýbogy Birinshi álemdik toby matchtarynyń jerebesi tartyldy.

Qazaqstan quramasy syrt alańda Ońtústik Koreıamen kezdesedi. 

Match 12-13 nemese 13-14 qyrkúıek kúnderi ótedi. Kort ıeleri oıyn ótetin qala men dál ýaqytyn keıin belgileıdi.

Jeńimpaz qurama kelesi komandalyq álem chempıonatynyń irikteý kezeńine joldama alady. 

Bul qos komandanyń úshinshi kezdesýi bolmaq. Esep ázirge teń – 1:1. 2007 jyly Koreıa óz alańynda qazaqstandyqtardy 5:0 esebimen utqan edi. Arada úsh jyl ótkende, Qazaqstan quramasy óz alańynda dál sondaı eseppen qarymta qaıyrdy.

Eske sala keteıik, budan buryn Indıan-Ýells týrnırinde ıÝlııa Pýtıntsevanyń juptyq synda ekinshi aınalymǵa shyqqanyn jazǵan bolatynbyz.