Tennısten Devıs kýbogi: Qazaqstan – Argentına matchyn Tımofeı Skatov esepti teńestirdi

ASTANA. KAZINFORM – Rosarıo qalasynda Devıs kýbogi irikteý kezeńi aıasynda Qazaqstan – Argentına matchynda Tımofeı Skatov tarazy basyn teńestirdi.  

Kort ıeleri eń kúshti oıynshylaryn shyǵarǵandyqtan, matchtyń aıqyn favorıtteri argentınalyqtar edi.

Jarystyń birinshi kúni aldymen ATR reıtıngisinde 338-orynda turǵan Dmıtrıı Popko álemniń 22-raketkasy Fransısko Serýndolomen synǵa tústi.

Báseke F.Serýndolonyń basymdylyǵymen ótti – 7:5, 6:2. 

Ekinshi bolyp kortqa reıtıngide 278-oryndaǵy Tımofeı Skatov álemniń 28-raketkasy Tomas  Martın Etcheverrımen sheberlik baıqasty.

Birinshi partııada T.Skatov esep 5:4 bolǵan mezette breık jasaı aldy – 6:4. 

Ekinshi sette esep 6:5 bolǵan mezette Tımofeı taǵy bir breık jasap, jeńisti julyp aldy – 7:5. 

Eki saǵat 21 mınýtqa sozylǵan tartysty báseke barysynda Skatov eıs jasamaǵanymen, 7 breık-poınttyń ekeýin sátti paıdalandy. Qarsylasy 5 eıspen ǵana kózge tústi.

Osylaısha, Qazaqstan – Argentına matchynda esep teńesti – 1:1. 

Jeksenbi kúnge bir juptyq, eki jekeleı synda oıyndar belgilengen. Úsh jeńiske qol jetkizgen komanda Devıs kýboginiń fınaldyq kezeńine joldama alady. 

Eske sala keteıik, budan buryn tennısten Devıs kýboginde Qazaqstan – Argentına matchynyń jerebesi tartylǵanyn jazǵan bolatynbyz.

Sondaı-aq Aleksandr Býblık Monpele týrnıriniń fınalyna ótti.