Tennısten álemniń birinshi raketkasy dopıng daýyna qaldy

ASTANA. KAZINFORM — Álemniń birinshi raketkasy, ıtalııalyq ıAnnık Sınner dopıng daýyna ilikti.

Tennıs ádildigin qamtamasyz etý jónindegi Halyqaralyq agenttiginen (ITIA) taralǵan málimetke qaraǵanda, ıA.Sınner dopıngten eki ret tutylǵan.

Indıan-Ýells (AQSh) masters týrnıri kezinde bıylǵy 10 naýryzda ótkizilgen test ıtalııalyq tennısshiniń aǵzasynda sportta tyıym salynǵan anabolıkalyq steroıd – klostebol bar ekendigin kórsetti.

Sondaı-aq jarystan tys ýaqytta, 18 naýryzda alynǵan taldaý da Australian Open chempıonynda klostebol metabolıti tabylǵanyn pash etti.

Sınner Indıan-Ýells dodasynda alǵan reıtıngilik upaıy men tapqan tabysynan aıyryldy, alaıda basqalaı aıypqa tartylǵan joq. Óıtkeni táýelsiz trıbýnal onyń aǵzasyna dopıng baıqaýsyzda túsken dep tanydy.

Eske sala keteıik, budan buryn ıÝlııa Pýtıntsevanyń álemdik reıtıngide birden 199 satyǵa kóterilgenin jazǵan bolatynbyz.

Sondaı-aq Anna Danılına Meksıkadaǵy jarystyń shırek fınalyna joldama aldy.