Tennısten álemdik reıtıngide alǵashqy ondyqqa kirgim keledi – Andreı Golýbev
NUR-SULTAN. QazAqparat – Topyraq tósenishindegi jarystardan keıin Qazaqstannyń juptyq syndaǵy birinshi raketkasy Andreı Golýbev elordaǵa oraldy. Aldaǵy týrnırlerge daıyndalatyn tennısshi bıylǵy birinshi jartyjyldyqty qorytyndylap, bolashaq oı-josparlary jóninde QazAqparat tilshisine aıtyp berdi.
- Andreı, elge qosh keldiń! Topyraq tósenishinde ótken dodalar óziń kózdegendeı boldy ma ?
-Joq. Rolan Garrosqa deıingi jarystarda jáne Frantsııa ashyq chempıonatynda sáttirek óner kórsetkim kelgen. Maqsat tıtýlǵa qol jetkizý bolatyn. Ol oıymyz oryndalmady. Tek Rımdegi masters týrnıriniń jartylaı fınalyna deıin jetkenimiz ǵana kóńil jubatady.
- Biraz ýaqyt boıy frantsııalyq tennısshi Fabrıs Martenmen juptasyp, saıysqa túsip kelesiń. Basqa da serikteriń boldy. Belgili bir ýaqyt ótkennen keıin juptasyńmen qoshtasý sáti týatynyn sezesiń be ?
-Nátıje bolmasa nemese serigińniń oıyn kestesi sáıkes kelmese, aýystyrýǵa týra keledi. Mysaly, bireýi basqa týrnırde oınaǵysy keledi. Ekinshisi ony qalamaıdy. Juptyq tennıste mundaı sátter jıi kezdesedi.
- Al jekeleı synda ózińniń erekshe este qalǵan matchtaryń az emes shyǵar ?
- Árıne, az bolǵan joq. Mysaly, Qazaqstan quramasy sapynda Devıs kýbogynda Jenevada Stanıslas Vavrınkamen, Chehııada Tomash Berdyhpen, elimizde belgııalyq Davıd Goffenmen oınaǵanym umytylmaq emes. Jekeleı synda Gambýrgte fınalǵa deıin jettim. Aýstralııada reseılik Mıhaıl ıÝjnyımen bes setke sozylǵan match, Soderlıngpen oıyn jadymda. Mundaı tartysty básekeler kóp boldy.
- Eki apta buryn juptyq reıtıngide rekordtyq nátıjege qol jetkizdiń. Rımdegi masterstiń jartylaı fınalyna shyǵýyńnyń arqasynda 21-orynǵa kóterildiń. Qazir 22-satydasyń. Maýsym sońyna deıin TOP-10-ǵa kirýge múmkindik bar ma ?
-Buǵan qol jetkizýge bolady. Sondaı mindet qoıdym. Ol úshin tabysty óner kórsete bilýim kerek.
- Qazaqstan quramasy sapynda Devıs kýbogynda 14 jyl boıy oınap kelesiń. El namysyn qorǵaý kezinde erekshe sezimge bólenesiń be, álde úırenip kettiń be ?
-Qazaqstan atynan birinshi ret pe, álde besinshi, jıyrmasynshy ret pe, báribir, jaýapkershilik júgi esh kemimeıdi. Tek Devıs kýbogynyń jańa formatyna baılanysty aıtarym bar. Beıtarap aımaqta úsh komandaǵa qarsy oınaý ońaı emes. Degenmen qarsylasymyz Ulybrıtanııa, Norvegııa nemese Ispanııa bolsyn, biz qazaqstandyq jankúıerlerdiń qoldaýyn árkez sezinemiz.
- Bıyl Qazaqstan tennısi úshin erekshe jyl bolyp tur. Erler Devıs kýbogy, áıelder Bıllı Djın Kıng kýbogynyń fınaldyq kezeńinde jáne 14 jasqa deıingi jasóspirimder álem chempıonatynda óner kórsetpekshi. Qazaqstan oınaıtyn erler tobyna Ulybrıtanııa, AQSh, Nıderlandy sekildi myqty quramalar tústi. Osy aıtýly jarystan ne kútesiń ?
-Bizge tájirıbeli de kúshti komandalar tap boldy. Basqalaryn aıtpasaq ta, Nıderlandynyń ózi budan birneshe jyl burynǵy kezdeskendegideı emes, deńgeıi ósti. Jekeleı synda TOP-60-qa kiretin eki oıynshysy bar. Juptyq synda da osal emes. Qaı match ta tartysty bolmaq.
- Kógaldaǵy tósenishte ótetin maýsymǵa nendeı jospar bar, Ýımbldonǵa baratyn shyǵarsyń ?
-Ýımbldonǵa baramyn ba, álde barmaımyn ba, ázirge sheshken joqpyn. Óıtkeni Kásipqoı tennısshiler qaýymdastyǵy (ATR) Ýımbldonda jeńis úshin beriletin upaılardy alyp tastady. Múmkin, sol kezeńdi ózimniń qalpyma kelý úshin paıdalanatyn shyǵarmyn. Odan keıingi dodalarǵa qatysý úshin de bap kerek qoı. Kógaldaǵy tósenish maýsymynda Germanııadaǵy Galle ATR 500 jáne Ispanııadaǵy Malorka ATR 250 týrnırinde baq synaıtynym anyq. Qalǵanyn ýaqyt kórsetedi.
-Andreı, áńgimeńe rahmet, tabys tileımin.
Eske sala keteıik, budan buryn Elena Rybakınanyń Rolan Garros týrnırinde jarys jolynan shyǵyp qalǵanyn jazǵan bolatynbyz.
