Tennısten álemdegi eń iri jarystyń biri ótpeıtin boldy
NUR-SULTAN. QazAqparat – Koronavırýs indetiniń taralýyna baılanysty jýyrda Ýımbldon týrnıriniń bolmaıtyny jóninde jarııa etilmek, dep habarlaıdy QazAqparat tilshisi.
Ulttyq olımpıada komıtetinen málim etkendeı, álemdegi eń iri jarystyń biri 29 maýsym men 12 shilde aralyǵynda ótýi kerek edi.
Osy aptada Búkilaǵylshyndyq laýn-tennıs klýby dırektorlarynyń shuǵyl keńesi ótip, onda týrnırdiń bolmaıtyny jóninde sheshim qabyldanbaq.
Osylaısha, Ýımbldon týrnıri 1945 jyldan beri birinshi ret ótpeı qalaıyn dep tur.
Germanııa tennıs federatsııasynyń vıtse-prezıdenti Dırk Hordorf ta jarysty uıymdastyrýshylardyń 1 sáýir kúni resmı málimdeme jasaıtynyn aıtty.
«Men ATP jáne WTA basshylarymen baılanystamyn, olar qajetti sheshimdi qabyldady. Endi Ýımbldondy uıymdastyrýshylar týrnırdiń bolmaıtyny jónindegi sheshimdi jarııa etpekshi. Bul qazirgideı jaǵdaıda durys ta, qajetti dep esepteımin. Koronavırýsqa baılanysty osyndaı shekteýler kezinde kúlli álemnen júzdegen myń adam aǵylatyn mundaı halyralyq jarysty ótkizý múmkin emes», - dep keltiredi D.Hordorftyń sózin Reuters agenttigi.
Qazirgi tańda barlyq tennıs týrnırleri jazǵa deıin toqtatylǵany belgili.
Ýımbldon jarysy – jyl saıyn ótetin tórt «Úlken dýlyǵa» týrnıriniń biri. Budan buryn «Rolan Garros» týrnıri kúzge qaldyrylǵan bolatyn.
Eske sala keteıik, budan buryn Tokıo Olımpıadasynyń qashan ótetini belgili bolǵanyn jazǵan edik.
