Tennısten álem chempıonaty: Qazaqstan jasóspirimderi irikteý týrnıriniń shırek fınalyna shyqty

ASTANA. QazAqparat – Shymkent qalasynda 16 jasqa deıingiler arasynda Azııa – Tynyq muhıt aımaǵy boıynsha ótip jatqan álem chempıonatynyń irikteý týrnırinde Qazaqstan jasóspirimderi shırek fınalǵa shyqty, dep habarlaıdy QazAqparat tilshisi.

Qazaqstandyqtar D tobynda ekinshi kezdesýin Taıbeı quramasymen ótkizdi

Aldymen Zańǵar Nurlanuly Vang Chýndy 6:2, 6:2 esebimen utty.

Sodan keıin Ámir Omarhanov Jý Fengtiń meselin qaıyrdy – 6:4, 6:0.

Juptyq synda Ámir Omarhanov pen Damır Jalǵasbaı qarsylastarynyń osal tusyn tapty – 6:3, 6:4.

Osylaısha, 3:0 esebimen jeńiske jetken Qazaqstan jasóspirimder quramasy merziminen buryn shırek fınalǵa joldama aldy.

Erteń Ózbekstanmen ótetin matchta topta kimniń birinshi oryn alatyny sheshiledi. Shırek fınal jerebesi 10 mamyr kúni keshkisin tartylady.

Álem chempıonatyna Azııa – Tynyq muhıt aımaǵynan tek tórt komanda joldama alady.

Eske sala keteıik, budan buryn Elena Rybakınanyń Rım masters týrnırindegi qarsylasy anyqtalǵanyn jazǵan bolatynbyz.

Sondaı-aq Qazaqstan jasóspirimder quramasy Jańa Zelandııany oısyrata utty.