Tennısten álem chempıonaty irikteý týrnırinde Qazaqstan jasóspirimderi Aýstralııamen kezdesedi

ASTANA. QazAqparat – Shymkent qalasynda 16 jasqa deıingiler arasynda Azııa – Tynyq muhıt aımaǵy boıynsha álem chempıonaty irikteý týrnıriniń toptyq básekeleri aıaqtaldy, dep habarlaıdy QazAqparat tilshisi.

Qazaqstan tennıs federatsııasynan málim etkenindeı, qazaqstandyq jasóspirimder D tobynda sońǵy matchynda Ózbekstan quramasyn 2:0 esebimen utty.

Bastapqy kezdesýde Zańǵar Nurlanuly Nýrıddın Bahtıerovti 6:4, 7:6 (7:3) esebimen tize búktirdi. Sodan keıin Ámir Omarhanov Sýhrob Saıdovty jeńdi – 6:3, 6:2.

Jerebe qorytyndysyna sáıkes erteń, 11 mamyr kúni shırek fınalda Sergeı Kvaktyń shákirtteri Aýstralııa quramasymen kezdesedi. Aýstralııa – 16 jasqa deıingiler arasynda álem chempıonatyn 6 ret utqan óte myqty qarsylas.

Shırek fınalda sondaı-aq Ońtústik Koreıa – Úndistan, Ózbekstan – Taıland, Gonkong – Japonııa komandalary sheberlik baıqasady. Azııa – Tynyq muhıt aımaǵynan úzdik tórt qurama álem chempıonatyna joldama alady.

Eske sala keteıik, budan buryn Qazaqstan jasóspirimderiniń irikteý týrnıriniń shırek fınalyna shyqqanyn jazǵan edik.