Tennısten ÁCh: qazaqstandyq jasóspirimder shırek fınalda Slovenııamen oınaıdy
NUR-SULTAN. QazAqparat – Prosteev qalasynda (Chehııa) 14 jasqa deıingiler arasynda ótip jatqan komandalyq álem chempıonatynyń (2022 ITF World Junior Tennis Finals) shırek fınalynda qazaqstandyq jasóspirimder Slovenııa quramasymen oınaıdy, dep habarlaıdy QazAqparat tilshisi.
Qazaqstan tennıs federatsııasynan málim etkenindeı, Slovenııamen match 4 tamyz kúni elorda ýaqyty boıynsha shamamen 14:00-de bastalady.
Qazaqstan quramasynyń kapıtany Sergeı Kvaktyń aıtýynsha, qazaqstandyq jasóspirimder álem chempıonaty barysynda tabysty óner kórsetip keledi.
«Men óz shákirtterimmen maqtanamyn. Ekvadormen oıyn álem chempıonatyndaǵy alǵashqy match bolǵandyqtan, qazaqstandyq jasóspirimder tolqýdy bastan keshirip, ese jiberip aldy. Sodan keıin Argentına men Italııa sııaqty asa myqty komandalardy utyp, shırek fınalǵa joldama aldy. Bul – tarıhı jeńis», - dedi S. Kvak.
Eske sala keteıik, budan buryn tennısten álem chempıonatynda qazaqstandyq jasóspirimderdiń alǵash ret shırek fınalǵa shyqqanyn jazǵan bolatynbyz.
Toptyq básekede Italııamen ótken matchta Sergeı Kvaktyń shákirtteri álem chempıondaryn 3:0 esebimen tize búktirdi. Úshinshi, juptyq kezdesýde Damır Jalǵasbaı men Danıel Tazabekov qarsylastarynan 6:1, 6:3 esebimen basym tústi.
Foto: ktf.kz
