Tennısten ÁCh: Qazaqstan jasóspirimder quramasy irikteý týrnırin ekinshi orynmen aıaqtady

ShYMKENT. KAZINFORM – Shymkent qalasyndaǵy Beeline Arena ulttyq tennıs ortalyǵynda 16 jasqa deıingiler arasynda Devıs kýboginiń Azııa – Tynyq muhıt aımaǵy boıynsha irikteý týrnıri máresine jetti.

Fınalda Qazaqstan jasóspirimder quramasy Japonııa komandasyna asa tartysty matchta 1:2 esebimen jol berdi.

Shymkentte birneshe kún boıy jańbyr jaýýyna baılanysty alǵashqy eki oıyn zalda hard tósenishinde ótkizildi. Aldymen Damır Jalǵasbaı Kavanıshı Hıýǵa ese jiberdi – 6:1, 1:6, 1:6.

Budan keıin Zańǵar Nurlanuly Japonııa komandasynyń kóshbasshysy Tabato Rıýdan aılasyn asyrdy – 6:4, 6:4. Zańǵar irikteý kezeńinde 6 kezdesý ótkizip, bárinde qarsylastaryna birde-bir set bermeı, jeńiske jetti.

Úshinshi, sheshýshi básekede juptyq synda upaı japonııalyqtardyń qanjyǵasynda ketti – 3:6, 7:6 (7:5), 10:6.

Japonııa ekinshi jyl qatarynan irikteý týrnırinde birinshi orynǵa ıe boldy.

Sońǵy synda utylyp qalǵanyna qaramastan, Sergeı Kvaktyń shákirtteri bir apta boıy jeńiske degen jigerlerin janı bildi. Ótken jyly qazaqstandyq jasóspirimder úzdik úshtikke ilikse, bıyl ekinshi satydan kórindi.

Endi Japonııa, Qazaqstan, Gonkong jáne qytaılyq Taıbeı komandalary aldaǵy kúzde Juniors David Cup fınaldyq kezeńinde baq synaıdy.

Eske sala keteıik, budan buryn Tımofeı Skatovtyń Germanııadaǵy týrnırdiń chempıony atanǵanyn jazǵan bolatynbyz.