Tennısten ÁCh: Qazaqstan jasóspirimderi irikteý týrnıriniń qola júldegeri atandy
ASTANA. QazAqparat - Shymkent qalasynda 16 jasqa deıingiler arasynda Azııa - Tynyq muhıt aımaǵy boıynsha tennısten álem chempıonatynyń irikteý týrnıri máresine jetti, dep habarlaıdy QazAqparat tilshisi.
Qazaqstan tennıs federatsııasynan málim etkenindeı, qazaqstandyqtar qola júlde úshin matchta Taıland quramasyn 2:0 esebimen tize búktirdi.
Aldymen Zańǵar Nurlanuly qarsylasyn 7:5, 6:0 esebimen utty.
Ámir Omarhanov 20 mınýt ishinde esepti 6:0, 1:0 qyldy. Sodan keıin taılandtyq oıynshy básekeni jalǵastyrýdan bas tartty.
Qazaqstan namysyn Á.Omarhanov pen Z.Nurlanulyna qosa Damır Jalǵasbaı qorǵady. Kapıtany - Sergeı Kvak. Dene daıyndyǵy boıynsha bapker Dmıtrıı Kostetskıı.
Qazaqstan tennıs federatsııasynyń prezıdenti Bolat Ótemuratov jasóspirimderdiń osynaý tabysyn atap ótip, salada jasalǵan jumystyń nátıje berip kele jatqanyn jetkizdi.
Osylaısha, kúzde Ispanııanyń Kordoba qalasynda 16 jasqa deıingi jaspirimder arasynda ótetin Devıs jáne Bıllı Djın Kıng kýboginiń fınaldyq kezeńinde alǵash ret qazaqstandyq qyzdar men uldar quramalary baq synaıdy.
Eske sala keteıik, budan buryn Qazaqstan jasóspirimder quramasynyń tennısten álem chempıonatynyń irikteý týrnırinde 3-orynǵa talasatynyn jazǵan bolatynbyz.
Sondaı-aq Aleksandr Býblık Rım masters týrnıriniń úshinshi aınalymyna shyqty.
Elena Rybakına Rım masters týrnıriniń úshinshi aınalymyna ótti.
