Tennısten ÁCh: Qazaqstan komandasy alǵashqy jeńisine qol jetkizdi

Ispanııanyń Kordova qalasynda 16 jasqa deıingi jasóspirimder arasynda ótip jatqan Davis Cup Juniors Finals týrnırinde Qazaqstan quramasy alǵashqy jeńisine qol jetkizdi, dep habarlaıdy Kazinform.

Komandalyq álem chempıonatynda Sergeı Kvaktyń shákirtteri Ońtústik Koreıa komandasymen sheberlik baıqasty.

Ońtústikkoreıalyqtar bir kún buryn jasóspirimder Devıs kýboginiń alty dúrkin jeńimpazy Ispanııany utqan bolatyn. Onyń ústine qazaqstandyqtar Shymkent qalasynda ótken álem chempıonatyna irikteý kezeńiniń jartylaı fınalynda osy ońtústikkoreıalyqtarǵa ese jibergen edi.

Birinshi bolyp Zańǵar Nurlanuly (331 ITF Juniors ranking) Kım Mý Bınmen (285 ITF Juniors ranking) kortqa shyqty. Úsh saǵatqa jýyq ýaqytqa sozylǵan tartysty báseke Kım Mýdyń paıdasyna aıaqtaldy – 6:4, 4:6, 6:7 (3:7).

Ekinshi oıynda Ámir Omarhanov (99 ITF Juniors ranking) jasóspirimder arasynda álemniń 68-raketkasy Hvan Don Hendi tas-talqan etip jeńdi – 6:2, 6:2.

Sheshýshi, juptyq synda Damır Jalǵasbaı men Ámir Omarhanov 46 mınýtta Kım Mý Bın – Chon En Sýdan aılalaryn asyrdy – 6:3, 6:2.

Osylaısha, D tobynda ár komandanyń qorjynynda 3 upaıdan bar. Seısenbi kúni Ispanııa Italııadan basym tústi.

Búgin Qazaqstan quramasy Ispanııamen oınaıdy.

Eske sala keteıik, budan buryn Beıbit Juqaevtyń AQSh-taǵy jarysty jeńispen bastaǵanyn jazǵan edik.

Devıs kýboginde Qazaqstan jasóspirimder quramasy tartysty matchta Italııaǵa jol berdi.

https://kaz.inform.kz/news/beybt-zhukaev-aksh-tagi-zharisti-zhenspen-bastadi-2e007b/

https://kaz.inform.kz/news/devis-kubog-kazakstan-zhasosprmder-kuramasi-tartisti-matchta-italiyaga-zhol-berd-ad046a/