Tennıstegi eń bıik shyńdardy baǵyndyrǵym keledi — Zańǵar Nurlanuly

ASTANA. KAZINFORM – Jýyrda 17 jastaǵy Zańǵar Nurlanulynyń jasóspirimder arasynda Aýstralııa ashyq chempıonatynyń jartylaı fınalyna deıin jetkeni belgili. Osyǵan oraı Kazinform tilshisi jas tennısshige birneshe saýal qoıǵan edi. 

— Zańǵar Nurlanuly, jasóspirimder arasynda qazaqstandyqtardan alǵash ret AQSh jáne Aýstralııa chempıonatynyń jartylaı fınalyna shyqtyń. Bul tabysqa qalaı jettim dep oılaısyń?

— Bul tarıhı jetistik ońaılyqpen kelgen joq. Ótken jyldyń jeltoqsan aıyn jattyǵýmen ótkizdim. Osy jasóspirimder arasyndaǵy Aýstralııa ashyq chempıonatyna daıyndaldym. Sosyn qos bapkerim, ákem — bárimiz qańtardyń 3-i kúni Aýstralııaǵa keldik. Osynda daıyndyq jumystaryn júrgizdik. Jergilikti aýa raıyna beıimdeldik. Tralalgon qalasynda ITF Juniors J300 týrnıriniń shırek fınalyna deıin jettim.

Átteń, Aýstralııa chempıonatynyń shırek fınalynda alǵan az-kem jaraqatym kedergi boldy. Jartylaı fınalmen arada bir kún demalys bolǵanda ǵoı, qalpyma keler edim. Jartylaı fınaldaǵy qarsylasym, amerıkalyq tennısshini (Kıton Hans) 14 jasqa deıingiler arasyndaǵy álem chempıonatynda utqanmyn. Osy Aýstralııa chempıonatynda jeńimpaz atanǵan slovenııalyq Zıgo Sheshkony da 14 jasqa deıingiler arasynda Eýropadaǵy talaı jarysta jeńip júrdim.

— Alǵash raketka ustaǵan kúniń esińde me, kimdi ustazym dep esepteısiń?

— Árıne, esimde. Meni tennıske ákem tórt jasymda alyp keldi. Sondyqtan birinshi bapkerim de — ákem.

— Tennıstegi kýmıriń kim?

— Óz basym Novak Djokovıch, ıAnnık Sınner, Aleksandr Býblık oıyndaryn tamashalaýdy unatamyn.

— Aýstralııa ashyq chempıonatynyń shırek fınalynda Gonkong ókili Kaı Tompsonmen oıynda jaraqat alyp qaldyń. Soǵan qaramastan, jeńiske jettiń. Qazir qalpyńa keldiń be?

— Ol oıyn maǵan ońaı bolmady, úshinshi sette aıaǵym qurysyp qaldy. Tipti turýdyń ózi qıynǵa soqty. Degenmen men barymdy saldym. Óıtkeni artymda maǵan úkilep úmit artqan halqym turǵanyn túsindim. Eldiń senimin aqtaýym kerek edi. Arenada kók týymyzdy jelbiretip ustaǵan kórermender boldy, olar da maǵan kúsh, rýh berdi.

— Seni qazirdiń ózinde qazaqtyń Alkarasy dep jatyr. Buǵan qalaı qaraısyń?

— Shynymdy aıtsam, maǵan teńeýler unamaıdy. Meniń óz dara jolym bar. Birte-birte alǵa qadam basyp, óz arman-maqsatyńa jetesiń dep ákem aıtady.

— Kóp uzamaı 18 jasqa tolasyń. Bıyl alda qandaı jarystar bar? Eresekter arasyna ótý de ońaı emes qoı?

— Bıyl jasóspirimder arasynda Aýstralııa chempıonatynan keıin qalǵan úsh «Úlken dýlyǵa» týrnırinde óner kórsetemin. Sodan keıin qalǵandarynyń bári — eresekter arasyndaǵy jarystar. Atap aıtqanda, ITF jáne ATP Challenger dodalarynda baq synaımyn. Qysqasy, jumys kóp alda.

— Ómirdegi basty arman-maqsattaryń qandaı?

— Eń bastysy, áke-sheshem, týystarymnyń denderi saý, bastary aman bolsyn. Basty armanym — tennıstiń eń bıik shyńdaryn baǵyndyrý, kók týymyzdy jelbiretý. Men Qazaqstanymdy qatty jaqsy kóremin, halqym óte adal. Bárimiz aman bolsaq, elimiz tynysh bolsa deımin, odan basqa tilegim joq.

Eske sala keteıik, budan buryn Aýstralııa ashyq chempıonatynda Zańǵar Nurlanulynyń alǵash ret jartylaı fınalǵa shyqqanyn jazǵan edik.

Sondaı-aq Zańǵar Nurlanuly álemdik reıtıngide TOP-10-ǵa kirdi.