Tennısshilerimizdiń tabysy áli alda – Dıas Dosqaraev

ASTANA. KAZINFORM — Qazaqstan tennıs federatsııasynyń vıtse-prezıdenti Dıas Dosqaraev Bıllı Djın Kıng kýboginiń Japonııa men Qazaqstan arasyndaǵy irikteý matchyn qorytyndylap, Kazinform tilshisine suhbat berdi.

- Dıas Baýyrjanuly, eki kúnge sozylǵan teketires jóninde ne aıtasyz?

- Árıne, atalmysh matchta jeńilip qalǵanymyz ókinishti. Degenmen komanda kóshbasshysy Elena Rybakına oınamasa da, bizde múmkindik boldy. Bıyl aqpanda Qazaqstan erler quramasy kóshbasshy tennnısshilersiz óner kórsetse de, qaısarlyq tanytyp, jeńiske bir qadam jetpeı toqtady. Bul joly birinshi kúni ıÝlııa Pýtıntseva Naomı Osakamen básekede ekinshi sette utýyna bolatyn edi. Anna Danılına jekeleı synda oıdaǵydaı oınaı almady. Ekinshi kúni ıÝlııa esepti qysqartyp, Jibek Qulambaevanyń Osakaǵa qarsy turýyna múmkindik beredi dep úmittendik. Bul komandalyq jarys bolǵandyqtan, bári de múmkin. Sheshýshi oıynǵa deıin jetemiz dep oıladyq, juptyq synǵa qatty daıyndaldyq. Jalpy alǵanda, komanda qoldan kelgenniń bárin jasady. Syrt alańda Japonııa sııaqty kúshti komandamen synǵa túsý ońaı emes. 

- Kóptegen jankúıer birinshi kúni nege Jibek nemese Arýjanǵa múmkindik berilmedi, jekeleı synda Japonııanyń myqty tennısshisine nege Anna Danılınany shyǵardy? dep suraıdy. Buǵan ne ýáj aıtar edińiz?

- Bapkerlik shtab bárin esepteıdi. Tájirıbe, ázirlik jıyny, oıynshylardyń dene daıyndyǵy, taktıka, strategııa jáne basqa jaıttardyń barlyǵy eskeriledi. Mysaly, kópshilik ádette ázirliktiń qalaı ótkendigine jete bilmeıdi. Oıynshylar bir-eki kún buryn jattyǵýda ózderin qalaı sezinedi, olar belgili bir qarsylastyń stıline beıimdele alady ma, osynyń bári sarapqa salynady. Árıne, reıtıngidegi aıyrmashylyqty túsinemiz. Únemi WTA týrnırlerinde turaqty oınap júrgen Nao Hıbıno men reıtıngide 400-900-oryn aralyǵyndaǵylardyń taıtalasýy qıyn. Qosalqy quramda negizgi oıynshylardy almastyra alatyndaı tennısshiler ázirge bolmaı tur. Budan qorytyndy shyǵaryp, jumys isteýdemiz. Zarına Dııastyń daıyn bolýy úshin bar kúshimizdi saldyq, biz ony umytqan joqpyz. Sondyqtan Anna, Jibek, Arýjan, Zarınanyń ishinen qazirgi sátte eń laıyqtysyn tańdadyq dep oılaımyn. Komandalyq jarystarda oıynshy el namysyn qorǵaıdy. Sol sebepti ol jeńilis tapsa, tutas komandaǵa da ońaı tımeıdi. Komandalyq týrnırlerdiń ereksheligi osynda. 

- Endi Qazaqstan – Japonııa matchynyń ońdy tustaryn ataı alasyz ba?

- Men oıynshylarymyzdyń básekesin muqııat qaıtalap kórdim. Árıne, ıÝlııanyń tórt birdeı matchboldy paıdalana almaýy ókinishti. Degenmen qazaqstandyqtar barynsha joǵary deńgeıde óner kórsetti, bul bizdiń baǵytymyzdyń durys ekendigin tanytady. Biz myqty komandaǵa tartysty matchta jol berdik. 24 jastaǵy Jibek Qulambaevanyń oıynyndaǵy ilgerileýshilik qýantady. Ol Annamen birge dúnıejúzilik reıtıngide TOP-20-ǵa kiretin jupty tize búktirdi. Jibektiń kortta ózin qalaı ustaǵanyn, qalaı sheber qımyldaǵanyn bárimiz kórdik.

- Sonymen, Zarına Dııas aqyry nege shyqpady?

- Oıynshylardyń jaraqattan keıin qalpyna kelýi óte qıyn. Óz sporttyq jolynda Zarına kóptegen ota jasatty, ol sońǵy eki jylda birde-bir ret resmı matchqa qatysqan joq. Qazir ǵana Zarına barlyq qıyndyqty jeńip, tennıske degen adaldyǵyn kórsetti, ulttyq qurama úshin oınaýǵa daıyn ekendigin bildirdi. Tokıoǵa kúni buryn kelip, jattyqty, ázirlendi. Biz oǵan senim artyp, túrli nusqany qarastyrdyq. Biraq biz úshin de, Zarına úshin de qaıta jaraqat alyp qaýpin eskerý mańyzdy. Sondyqtan bapkerlik shtabpen jaǵdaıdy saraptaı kele, onyń ózimen jáne jattyqtyrýshysymen aqyldasyp, kortqa basqa oıynshylardy shyǵarýdy jón dep taptyq. 

Eske sala keteıik, budan buryn Sonıa Jıenbaevanyń Túrkııadaǵy týrnırdiń chempıony atanǵanyn jazǵan edik. 

Sondaı-aq Elena Rybakınanyń Shtýtgart týrnırindegi qarsylasy anyqtaldy.