Tennısshi Jibek Qulambaeva Túrkııadaǵy jarystyń jeńimpazy atandy
ASTANA. QazAqparat - Qazaqstandyq Jibek Qulambaeva juptyq synda Túrkııanyń Antalıa qalasynda ITF W15 týrnıriniń jeńimpazy atandy, dep habarlaıdy QazAqparat tilshisi.
J.Qulambaeva reseılik Darıa Lodıkovamen birge fınalda shvetsııalyq Jaklın Kabaı Avad - grekııalyq Marta Matýlamen bas júldeni sarapqa saldy.
Qazaqstandyq-reseılik jup 6:1, 6:4 esebimen jeńiske jetip, chempıon atandy.
Álemniń 446-raketkasy Jibek Qulambaevanyń jekeleı synda da úzdik shyǵatyndaı múmkindigi bar. Ol jartylaı fınalda dúnıejúzilik reıtıngte 909-orynda turǵan túrkııalyq Bashak Eraıdyndy 6:3, 6:3 esebimen tize búktirdi.
J.Qulambaeva erteń fınalda reıtıngte 622-satydaǵy chehııalyq Denısa Hındovamen sheberlik baıqasady.
Eske sala keteıik, budan buryn Elena Rybakınanyń Maıamı fınalyndaǵy qarsylasy anyqtalǵanyn jazǵan bolatynbyz.
Sondaı-aq Elena Rybakına bir jylda úsh birdeı iri jarystyń fınalyna shyqqan altynshy tennısshi atandy.
