Tennısshi Jibek Qulambaeva bıylǵy besinshi tıtýlyna qol jetkizdi
ASTANA. QazAqparat – Qazaqstandyq Jibek Qulambaeva juptyq synda Italııada ótken ITF W25 týrnıriniń jeńimpazy atandy, dep habarlaıdy QazAqparat tilshisi.
Qazaqstan tennıs federatsııasynan málim etkendeı, 22 jastaǵy J. Qulambaeva latvııalyq Darıa Semenıstaıamen birge fınalda qytaılyq Djıng Lıý - bosnııalyq Anıta Vagnerdi 6:2, 6:2 esebimen tize búktirdi.
Kezdesý bir saǵattan astam ýaqytqa sozyldy.
Osylaısha, Jibek bıylǵy maýsymda ITF jarystarynda besinshi tıtýlyna qol jetkizdi. Ol sporttyq jolynda juptyq synda barlyǵy 19 ret úzdik shyqty. Oǵan qosa, jekeleı synda eki márte chempıon atandy.
Sondaı-aq, qazaqstandyq jasóspirimder Bakýde 14 jáne 16 jasqa deıingiler arasynda Tennis Europe dodasynda tabysty óner kórsetti. Atap aıtqanda, Team Kazakhstan akademııasynyń túlekteri Demıd Gorbachev pen Mansur Sháken juptyq synda eshkimdi shydatpady. Olar sońǵy básekede ırandyq Kırash Hanıfı - túrkııalyq Barýk Sıvaslıden aılasyn asyrdy – 6:2, 6:2. Jekeleı synda Demıd fınalda túrkııalyq Býgra Ozkochqa ese jiberdi – 2:6, 4:6.
Bakýde Arıana Gogýlına men Arýjan Nuranbaı fınalda reseılikter Vlada Gýreleva - Ýlıana Hrabavettske jol berdi – 2:6, 4:6. Jekeleı synda Arıana tartysty matchta V. Gýrelevadan utyldy – 1:6, 6:4, 0:6.
Eske sala keteıik, budan buryn Anna Danılınanyń Chehııadaǵy jarystyń jeńimpazy atanǵanyn jazǵan bolatynbyz.
Al, Qazaqstannyń birinshi, álemniń 25-raketkasy Elena Rybakına Portoroj (Slovenııa) WTA 250 týrnıriniń fınalyna shyqty.
