Tennısshi Tımofeı Skatov Italııadaǵy týrnırdi jeńispen bastady
ASTANA. QazAqparat – Qazaqstandyq, álemniń 209-raketkasy Tımofeı Skatov Parma 2 (Italııa) chellendjer týrnırin jeńispen bastady, dep habarlaıdy QazAqparat tilshisi.
Ótken aptada Lıssabon jarysynyń fınalyna deıin jetip, sonyń nátıjesinde álemdik reıtıngide 233-ten birden 209-satyǵa kóterilgen T.Skatov úshin qaı dodany da tabysty ótkizý mańyzdy.
Bul joly qazaqstandyq tennısshi alǵashqy aınalymda reıtıngte 513-oryndaǵy ıtalııalyq Stefano Napolıtanomen kortqa shyqty.
T.Skatov 7:5, 6:3 esebimen jeńiske jetti. Ol 1 saǵat 44 mınýtqa sozylǵan match barysynda eıs jasamaǵanymen, 7 breık-poınttyń beseýin paıdalana bildi. Qarsylasy 3 eıs, 3 breıkpen kózge tústi.
Tımofeı Skatov shırek fınalǵa shyǵý úshin álemniń 128-inshi, osy jarystyń 6-raketkasy, ıspanııalyq Karlos Taberner nemese reıtıngte 463-satydaǵy ıtalııalyq Franchesko Fortıdiń bireýimen talasady.
Eske sala keteıik, budan buryn Elena Rybakınanyń Chehııada álemniń 17-raketkasyn jeńgenin jazǵan bolatynbyz.
Sondaı-aq Astana Open ATP 500 týrnırinde álemniń birinshi raketkasy jeńilip qaldy.
Karen Hachanov Astanaǵa tennıs juldyzdary jınalǵanyn aıtty.
Foto: ktf.kz
