Tennısshi Rafael Nadal QR Prezıdentiniń shaqyrýymen Qazaqstanǵa keledi
ASTANA. QazAqparat - Qyrkúıektiń 24-25 kúnderi álemdik tennıs juldyzy Rafael Nadal tuńǵysh ret Astanaǵa keledi. Bul týraly búgin Ortalyq kommýnıkatsııalar qyzmetinde ótken brıfıngte Qazaqstan tennıs federatsııasynyń atqarýshy dırektory Dıas Dosqaraev málimdedi.
«Qazaqstan tennıs federatsııasyna QR Prezıdenti N. Nazarbaev osydan bir jyl buryn R. Nadaldi elge shaqyryp, tennıstiń damýyna úles qosar sharalar uıymdastyrýǵa tapsyrma bergen bolatyn. Sondyqtan biz jyl boıy osy jumyspen aınalysyp, aqyry ataqty sportshy elimizge keletin boldy. Árıne Rodjer Federer men Rafael Nadaldi kóptegen elder kórkemdik matchtaryn nemese sheberlik sabaqtaryn ótkizýge shaqyrady. Alaıda jumys kesteleriniń tyǵyzdyǵyna baılanysty olar barlyq shaqyrtýlarǵa bara almaıdy. Al R.Nadaldiń bizdiń elimizge kelýge kelisimin berýi kóp nárseni bildiredi, ıaǵnı budan elimiz de, tennısimizdiń de qaryshtap damyp kele jatqanyn kórýge bolady», - dedi ol.
D. Dosqaraevtyń aıtýynsha, ıspandyq tennısshi QTF-nyń usynysyn qýanyshpen qabyldap, kópten beri Qazaqstanǵa barǵysy kelip júrgenin bildirgen.
Ataqty tennısshi Astanada jas tennısshilerge sheberlik sabaǵyn berip qana qoımaı, kórkem matchqa da qatysady. Onyń qarsylasy álemdik TOP-10 tennısshiniń qataryna kiretin frantsýzdyq sportshy Jo-Vılfrıd Tsonga. Oıyn 25 qyrkúıekte Astanadaǵy Ulttyq tennıs ortalyǵynda ótedi.
D.Dosqaraevtyń aıtýynsha, R.Nadal «TeamKazakhstan» akademııasynyń jetekshi tennısshilerine sheberlik sabaqtaryn ótkizip, qazaqstandyq tennıstiń qalaı damyp jatqanyn óz kózimen kóredi. QR Prezıdenti N. Nazarbaevtyń qabyldaýynda bolyp, óz oılarymen bólisedi.
