Tennısshi Gózal Aınıtdınova Astanadaǵy jarystyń ekinshi aınalymyna ótti
ASTANA. QazAqparat – Qazaqstandyq Gózal Aınıtdınova Astanada ótip jatqan ITF World Tennis Tour «BeeTV 40 Women's» týrnıriniń ekinshi aınalymyna ótti, dep habarlaıdy QazAqparat tilshisi.
Dúnıejúzilik reıtıngte 505-orynda turǵan G.Aınıtdınova bastapqy kezdesýin álemniń 193-raketkasy, reseılik Anastasııa Zaharovamen ótkizdi.
Qazaqstandyq tennısshi qarsylasyn 6:3, 6:3 esebimen utty.
Taǵy bir qazaqstandyq Anna Danılına jekeleı synda makedonııalyq Lına Djercheskaǵa (223 WTA) 1:6, 4:6 esebimen jol berse, Jibek Qulambaeva horvatııalyq Tena Lýkastan utylyp qaldy – 2:6, 6:7 (3:7). Arýjan Saǵyndyqova álemniń 167-raketkasy, reseılik Polına Kýdermetovamen kezdesýde birinshi sette 3:1 esebimen alǵa shyqqanymen, sol qarqynyn jalǵastyra almady – 4:6, 1:6.
Eske sala keteıik, budan buryn úsh qazaqstandyq tennısshiniń juptyq synda Astanadaǵy týrnırdiń shırek fınalyna shyqqanyn jazǵan bolatynbyz.
Sondaı-aq Aleksandr Býblık Dýbaı týrnırin jeńispen bastady.
Qazaqstandyq jas tennısshi Eýropadaǵy úzdik 50 oıynshynyń qataryna kirdi.
