Tennısshi Elena Rybakına Sankt-Peterbýrg týrnıriniń shırek fınalyna shyqty
NUR-SULTAN. QazAqparat – Qazaqstannyń birinshi, álemniń 25-raketkasy Elena Rybakına Sankt-Peterbýrg WTA týrnıriniń shırek fınalyna shyqty, dep habarlaıdy QazAqparat tilshisi.
Osy jarystyń 8-raketkasy bolyp tirkelgen qazaqstandyq tennısshi ekinshi aınalymda reıtıngte 58-orynda turǵan frantsııalyq Fıona Ferromen kortqa shyqty.
Birinshi partııada breık jasaǵan frantsııalyq sportshy 3:1 esebimen alǵa shyqty. Budan keıin E.Rybakına qatarynan bes geımdi alyp, setti jeńispen bitirdi – 6:3.
Ekinshi setti F.Ferro taǵy da breıkpen bastady – 3:0. Degenmen E.Rybakına kóp uzatpaı, tarazy basyn teńestirip qana qoımaı, ózi alǵa shyqty – 5:3. Aqyry matchqa dop bergende, qatelesken joq – 6:4.
Báseke 1 saǵat 12 mınýtqa sozyldy.
E.Rybakına jartylaı fınalǵa shyǵý úshin reıtıngte 159-orynda turǵan taǵy bir frantsııalyq Osean Dodenmen talasady. O.Doden ekinshi aınalymda álemniń 14-inshi, osy dodanyń 4-raketkasy, ulybrıtanııalyq Iohanna Konteni 6:3, 6:4 esebimen utyp ketti.
Bir qyzyǵy, irikteý saıystarynyń fınalynda F.Ferro osy O.Dodennen jeńilip qalǵan bolatyn. Keıin latvııalyq tennısshi Anastasııa Sevastova negizgi týrnırge qatysýdan bas tartqannan keıin sonyń ornyna shaqyrylyp, birinshi aınalymda frantsııalyq Karolın Garsııany joldan taıdyrǵan edi.
Máskeýde týyp-ósken E.Rybakına 2018 jyly 18 jasynda Sankt-Peterbýrg týrnıriniń shırek fınalyna deıin jetip, mamandardyń nazaryn aýdarǵan bolatyn. Sol jyly Qazaqstan azamattyǵyn alyp, bizdiń eldiń namysyn qorǵaýǵa kóshti.
Eske sala keteıik, budan buryn Federatsııa kýbogynda Qazaqstannyń tennısshi qyzdarynyń Argentınamen oınaıtynyn, Mıhaıl Kýkýshkınniń Rotterdam týrnıriniń alǵashqy aınalymynan asa almaǵanyn jazǵan bolatynbyz.
