Tennısshi Elena Rybakına Nanchan týrnıriniń shırek fınalyna shyqty
NUR-SULTAN. QazAqparat – Qazaqstandyq Elena Rybakına Qytaıdaǵy Nanchan WTA týrnıriniń shırek fınalyna shyqty, dep habarlaıdy QazAqparat tilshisi.
Osy jarystyń tórtinshi, álemniń 69-raketkasy, 20 jasar E.Rybakına ekinshi aınalymda reıtıngte 176-orynda turǵan, jýyrda 18-ge tolatyn qytaılyq Sınıýı Vanmen kezdesti.
Tartysty órbigen birinshi partııa taı-breıkke deıin jetip, onda qazaqstandyq tennısshi basymdylyq kórsetti – 7:6 (7:4).
Ekinshi sette birden breık jasaǵan Rybakına alǵa shyqty – 2:0. Sodan keıin taǵy bir breıkpen esepti 5:1-ge jetkizdi. Aqyry ózi dop bergende, matchqa núkte qoıdy – 6:2.
Báseke 1 saǵat 38 mınýtqa sozyldy.
Osylaısha Elena júlde qory 250 myńń AQSh dollary bolatyn dodanyń shırek fınalyna shyqty.
E.Rybakına týrnırdiń altynshy, álemniń 76-raketkasy, shveıtsarııalyq Vıktorııa Golýbıchpen jartylaı fınal joldamasyn sarapqa salady.
Eske sala keteıik, budan buryn Elena Rybakınanyń Qytaıdaǵy Nanchan jarysyn jeńispen bastaǵanyn, al Zarına Dııastyń Hırosıma týrnıriniń shırek fınalyna shyǵa almaǵanyn jazǵan bolatynbyz.
