Tennısshi Elena Rybakına Qytaıdaǵy Nanchan týrnırin jeńispen bastady
NUR-SULTAN. QazAqparat – Qazaqstandyq Elena Rybakına Qytaıdaǵy Nanchan WTA týrnıriniń ekinshi aınalymyna shyqty, dep habarlaıdy QazAqparat tilshisi.
Qazaqstandyq tennısshi alǵashqy aınalymda úndistandyq Ankıta Raınamen sheberlik baıqasty.
Dúnıejúzilik reıtıngte 69-orynda turǵan 20 jasar E.Rybakına osy jarystyń 4-raketkasy bolyp tirkelse, odan alty jasqa úlkendigi bar qarsylasy 192-satyda edi.
Birinshi partııada birden breık jasaǵan úndistandyq sportshy alǵa shyqqanymen, E.Rybakına ile-shala tarazy basyn teńestirip úlgerdi – 2:2. Sosyn osy qarqynynan taıǵan joq – 6:2.
Ekinshi sette esep 1:1 bolǵan mezette qazaqstandyq tennısshi jıi qatelesip, qarsylasynyń breık jasaýyna múmkindik berip qoıdy – 1:2. Osy basymdylyqty A.Raına saqtap qaldy – 6:4.
Úshinshi, sheshýshi partııada breık jasaǵan Rybakına alǵa shyqty – 3:1. Esep 2:4 bolǵanda, úndistandyq sportshy da breık jasaı aldy. Degenmen Rybakına taǵy bir breıkke qol jetkizip, matchqa dop bergende, óz múmkindigin jibergen joq – 6:3.
Tartysty match 2 saǵat 5 mınýtqa sozyldy.
E.Rybakına ekinshi aınalymda reıtıngte 176-orynda turǵan qytaılyq Sınıýı Vanmen kezdesedi.
Júlde qory 250 myń AQSh dollaryna baǵalanǵan doda 15 qyrkúıekte márege jetedi.
Eske sala keteıik, budan buryn Zarına Dııastyń Hırosıma týrnırin jeńispen bastaǵanyn, ıÝlııa Pýtıntsevanyń álemniń 3-raketkasymen kezdesetinin, al Anna Danılınanyń osy Nanchanda utylyp qalǵanyn jazǵan bolatynbyz.
