Tennısshi Elena Rybakına Hobart týrnıriniń fınalyna shyqty
NUR-SULTAN. QazAqparat – Qazaqstannyń birinshi, álemniń 30-raketkasy Elena Rybakına Aýstralııadaǵy Hobart WTA týrnıriniń fınalyna shyqty, dep habarlaıdy QazAqparat tilshisi.
Osy jarystyń úshinshi raketkasy bolyp tirkelgen 20 jastaǵy qazaqstandyq sportshy jartylaı fınalda ulybrıtanııalyq Hıter Ýotsonmen kúsh synasty.
Qazirgi kezde reıtıngte 101-satyda turǵanymen, 27 jastaǵy H.Ýotson – úsh márte WTA jarystarynda jeńimpaz atanǵan, sonyń ishinde 2015 jyly osy Hobartta úzdik shyqqan tisqaqqan tennısshi. Sol kezde ol reıtıngte 38-orynǵa kóterilgen edi.
Kezdesýdi tabysty bastaǵan E.Rybakına birinshi partııany jeńispen támamdady – 6:3.
Esesine ekinshi sette qarsylasy 5:2 esebimen alǵa ketti. Budan keıin qazaqstandyq tennısshi esepti qysqartqanymen, teńestire almady – 4:6.
Úshinshi, sheshýshi partııa barysynda E.Rybakına medıtsınalyq kómekke de júgindi. Degenmen esep 5:4 bolǵanda, básekeni breıkpen aıaqtaı bildi – 6:4.
Tartysty match 2 saǵat 11 mınýtqa sozyldy.
E.Rybakına fınalda qytaılyq, álemniń 40-ynshy, osy dodanyń 4-raketkasy Chjan Shýaımen bas júldeni sarapqa salady. Ol jartylaı fınalda 22 jastaǵy reseılik Veronıka Kýdermetovany 6:3, 6:4 esebimen tize búktirdi.
Bul – E.Rybakınanyń bıylǵy ekinshi fınaly. Ótken aptada Qytaıdaǵy Shenchjen WTA týrnıriniń fınalynda reseılik Ekaterına Aleksandrovaǵa jol bergen bolatyn.
Eske sala keteıik, budan buryn Elena Rybakınanyń Hobart týrnıriniń jartylaı fınalyna shyqqanyn, Aýstralııa ashyq chempıonatynda qazaqstandyq tennısshilerdiń qarsylastary anyqtalǵanyn, Dmıtrıı Popkonyń irikteý saıystarynyń fınalyna joldama alǵanyn jazǵan bolatynbyz.
