Tennısshi Býblık Sankt-Peterbor týrnıriniń alǵashqy aınalymynan asa almady
NUR-SULTAN.QazAqparat – Qazaqstandyq Aleksandr Býblık Sankt-Peterbor ATP týrnırinde jeńilip qaldy, dep habarlaıdy QazAqparat tilshisi.
Dúnıejúzilik reıtıngte 70-orynda turǵan A.Býblık alǵashqy aınalymda osy týrnırdiń segizinshi, álemniń 60-raketkasy, norvegııalyq Kasper Rýýdpen kúsh synasty.
Qazaqstandyq tennısshi bıyl 22-ge tolsa, odan bir jas kishiligi bar qarsylasy mamandardyń nazaryn aýdaryp úlgergen talantty jastyń biri edi.
Birinshi sette másele taı-breıkke deıin jetip, onda A.Býblık basymdyq kórsetti – 7:6(7:3).
Ekinshi partııada esep 1:1 bolǵan mezette K.Rýýd breık jasap ketti. Aqyry sol basymdylyǵyn saqtaı bildi – 6:4.
Qaı sport túri bolmasyn óz múmkindigińdi paıdalanbasań, opyq jep qalasyń. Úshinshi, sheshýshi sette tórtinshi geımde Býblık breık-poıntty múlt jiberdi. Sodan keıin K.Rýýd kúsh alyp ketti – 6:2.
Báseke týra eki saǵatqa sozyldy.
K.Rýýd ekinshi aınalymda reıtıngte 114-satydaǵy ıtalııalyq Salvatore Karýzomen sheberlik baıqasady.
Eske sala keteıik, budan buryn Zarına Dııastyń Osaka týrnırinde jeńilip qalǵanyn, al Mıhaıl Kýkýshkınniń Sankt-Peterbor jarysynyń shırek fınalyna shyqqanyn jazǵan bolatynbyz.
