Tennısshi Beıbit Jýkaev Taılandtaǵy jarystyń jartylaı fınalyna shyqty
NUR-SULTAN. QazAqparat – Qazaqstandyq tennısshi Beıbit Jýkaev Taılandtaǵy Bangkok Open chellendjer týrnıriniń jartylaı fınalyna shyqty, dep habarlaıdy QazAqparat tilshisi.
Aqtaý tennıs mektebiniń túlegi, dúnıejúzilik reıtıngte 395-orynda turǵan B.Jýkaev shırek fınalda álemniń 271-raketkasy, monakolyq Valentın Vasheromen tartysty kezdesý ótkizdi.
Eki saǵattan astam ýaqytqa sozylǵan matchta qazaqstandyq tennısshi 7:5, 3:6, 7:6 (7:2) esebimen jeńisti julyp aldy.
Úshinshi, sheshýshi sette monakolyq sportshy esep 5:4 bolǵan mezette matchqa dop berdi. Biraq Beıbit breık jasap, tarazy basyn teńestirdi. Sosyn taı-breıkte aıqyn basymdylyq tanytty. Jýkaev báseke barysynda 18 eıs jasap, 3 breık-poınttyń ekeýin paıdalandy.
B.Jýkaev fınalǵa shyǵý úshin álemniń 432-raketkasy, frantsııalyq Artýr Kazomen talasady.
Eske sala keteıik, budan buryn AQSh ashyq chempıonatynda Anna Danılınanyń ekinshi aınalymǵa shyqqanyn jazǵan bolatynbyz.
Sondaı-aq qazaqstandyq eki tennısshi Ispanııadaǵy jarystyń shırek fınalyna ótti.
Foto: ktf.kz
