Tennısshi Beıbit Jýkaev QR Prezıdenti kýbogynyń 3 dúrkin chempıonyn utty
NUR-SULTAN. QazAqparat – Qazaqstandyq Beıbit Jýkaev Nontabýrıde (Taıland) ótip jatqan ATP Challenger Tour Bangkok Open 3 týrnırin jeńispen bastady, dep habarlaıdy QazAqparat tilshisi.
Dúnıejúzilik reıtıngte 395-orynda turǵan B.Jýkaev alǵashqy aınalymda álemniń 331-raketkasy, Qazaqstan Prezıdenti kýbogynyń úsh dúrkin chempıony, reseılik Evgenıı Donskoımen kezdesti.
Qazaqstandyq tennısshi tartysty matchta 7:6 (7:4), 7:6 (7:4) esebimen jeńiske jetti.
Eki saǵattan sál astam ýaqytqa sozylǵan báseke barysynda Jýkaev 7 eıs jasap, 8 breık-poınttyń ekeýin paıdalandy. Qarsylasy 9 eıs, 2 breıkpen (6 breık-poınt) kózge tústi.
Aqtaý tennıs mektebiniń túlegi shırek fınalǵa shyǵý úshin álemniń 242-inshi, jarystyń 1-raketkasy, japonııalyq Esýke Vatanýkımen talasady.
Taǵy bir qazaqstandyq, álemniń 250-raketkasy Tımofeı Skatov Sevılıa (Ispanııa) chellendjer dodasynyń ekinshi aınalymyna shyqty. Ol bastapqy kezdesýinde álemniń 208-raketkasy, ıtalııalyq Raýl Brankachchıony 6:4, 6:4 esebimen tize búktirdi.
T.Skatov dúnıejúzilik reıtıngte 408-satyda turǵan ıspanııalyq Haver Kosano Barrankomen shırek fınal joldamasyn sarapqa salady.
Eske sala keteıik, budan buryn TOP-10-ǵa kiretin bes tennısshiniń Astana Open ATP 500 týrnırinde óner kórsetetinin jazǵan bolatynbyz.
