Tennısshi Beıbit Jýkaev elorda týrnıriniń fınalyna deıin jetti
NUR-SULTAN. QazAqparat - Elordada «Dáýlet» tennıs ortalyǵynda ITF World Tennis Tour M25 týrnıri márege jetti, dep habarlaıdy QazAqparat tilshisi.
Qazaqstan tennıs federatsııasy málim etkendeı, júlde qory 25 myń AQSh dollaryna baǵalanǵan jarystyń fınalynda 21 jastaǵy qazaqstandyq tennısshi Beıbit Jýkaev reseılik Alıbek Kachmazovpen bas júldeni sarapqa saldy.
Beıbit úsh saǵatqa sozylǵan matchta 3:6, 7:6 (7:5), 6:7 (4:7) esebimen ese jiberdi.
Báseke barysynda Jýkaev 23 eıs jasaǵanymen, 4 breık-poıntty paıdalana almady.
Osy jarystyń fınalyna deıin jetýiniń arqasynda Aqtaý tennıs mektebiniń túlegi dúnıejúzilik reıtıngte 597-orynǵa kóterildi.
Eske sala keteıik, budan buryn Qazaqstan quramasynyń Devıs kýbogynyń fınaldyq kezeńine joldama alǵanyn jazǵan bolatynbyz.
