Tennısshi Beıbit Jýkaev eki márte el chempıony atandy
ASTANA. QazAqparat - «Dáýlet» tennıs ortalyǵynda ótken erler men áıelder arasyndaǵy Qazaqstan chempıonaty máresine jetti, dep habarlaıdy QazAqparat tilshisi.
Qazaqstan tennıs federatsııasynan málim etkenindeı, erler arasynda fınalda qysqy chempıonattaǵydaı, Beıbit Jýkaev pen Denıs Evseev ózara kezdesti.
Beıbit 7:6 (7:4), 6:4 esebimen jeńiske jetip, ekinshi ret Qazaqstan chempıony atandy.
Aqtaý tennıs mektebiniń túlegi Qazaqstan tennıs federatsııasynyń prezıdenti Bolat Ótemuratovtyń sheshimimen Astana Open ATP 500 týrnırinde jekeleı synda óner kórsetýge joldama aldy. Bul B. Jýkaevtyń eń alǵashqy iri jarysy bolmaq. Sondaı-aq, ol juptyq synda Aleksandr Býblıkpen birge baq synaıdy. Denıs Evseev pen Grıgorıı Lomakın de juptyq synda básekege túsedi.
Dostanbek Tashbolatovty 6:4, 6:4 esebimen jeńgen qaraǵandylyq Aryslanbek Aıtqulov alǵash ret qola júldege ıe boldy.
Áıelder arasynda Gózal Aınıtdınova Qazaqstannyń áldeneshe dúrkin jeńimpazy Jibek Qulambaevany 6:2, 6:1 esebimen tize búktirip, altynnan alqa taqty.
Janel Rústemovany 7:5, 6:4 esebimen súrindirgen Marııa Sınıtsyna úzdik úshtikke ilikti.
Eske sala keteıik, budan buryn qazaqstandyq tennısshiniń Argentınadaǵy jarystyń shırek fınalyna shyqqanyn jazǵan bolatynbyz.
