Tennısshi Aleksandr Býblık Sankt-Peterbýrg týrnırin sátti bastady
NUR-SULTAN. QazAqparat – Qazaqstannyń birinshi, álemniń 52-raketkasy Aleksandr Býblık Sankt-Peterbýrg ATR 500 týrnıriniń ekinshi aınalymyna shyqty, dep habarlaıdy QazAqparat tilshisi.
Osy qalada týyp-ósken A.Býblık alǵashqy aınalymda reıtıngte 221-orynda turǵan amerıkalyq Makkenzı Makdonaldpen kúsh synasty.
Birinshi partııada amerıkalyq sportshy 3:1 esebimen alǵa shyqty. Taǵy bir breık jasaǵan ol basymdylyǵyn tanyta aldy – 6:2.
Ekinshi set áldeqaıda tartysty órbip, másele taı-breıkte sheshildi. Taı-breıkte Býblık sátti oınaı bildi – 7:6 (7:2).
Úshinshi, sheshýshi partııada esep 4:4 bolǵan mezette qazaqstandyq tennısshi kezdesýdegi alǵashqy breıgine qol jetkizdi. Sodan keıin matchty eıspen túıindedi – 6:4.
Tartysty ótken báseke 2 saǵat 2 mınýtqa sozyldy.
A.Býblık oıyn barysynda 25 eıs jasasa, qarsylasy altaýmen shekteldi.
Qazaqstandyq tennısshi shırek fınalǵa shyǵý úshin álemniń 21-inshi, osy dodanyń 6-raketkasy, kanadalyq Mılosh Raonıch nemese reıtıngte 123-satydaǵy amerıkalyq Djeffrı Djon Volftyń bireýimen talasady.
Taǵy bir qazaqstandyq Mıhaıl Kýkýshkın erteń serbııalyq Mıomır Ketsmanovıchpen kortqa shyǵady.
Eske sala keteıik, budan buryn qazaqstandyq tennısshilerdiń reıtıngtegi jańa orny belgili bolǵanyn jazǵan edik.
