Tennısshi Aleksandr Býblık Chendý týrnıriniń fınalynda jeńilip qaldy
NUR-SULTAN. QazAqparat – Qazaqstandyq tennısshi Aleksandr Býblık Qytaıdaǵy Chendý ATP týrnıriniń fınalynda jeńilip qaldy, dep habarlaıdy QazAqparat tilshisi.
Dúnıejúzilik reıtıngte 71-orynda turǵan A.Býblık fınalda álemniń 63-raketkasy, ıspanııalyq Pablo Karreno-Býstamen chempıondyq ataq úshin talasty.
Qazaqstandyq tennısshi bıyl 22-ge tolsa, tájirıbeli qarsylasy 28 jasta edi.
Bul A.Býblıktiń sporttyq jolyndaǵy ATP jarystaryndaǵy ekinshi fınaly edi. Budan buryn ol bıyl AQSh-taǵy Nıýport dodasynyń fınalynda utylǵan edi.
Osyǵan deıin A.Býblık pen P.Karreno-Býstanyń bir-aq ret joldary toqaılasyp, 2016 jyly Máskeýdegi «Kreml kýbogy» jarysynyń shırek fınalynda ıspanııalyq sportshy 6:4, 2:6, 7:6 (7:1) esebimen utqan edi. Sosyn Pablo sol týrnırdiń chempıony atanǵan bolatyn. Jalpy, kezinde reıtıngte 10-orynǵa deıin kóterilgen ıspanııalyq tennısshi ATP dodalarynda úsh márte jeńiske jetken.
Bul joly birinshi partııa taı-breıkke deıin jetip, onda A.Býblık alǵashqy setbolyn paıdalana aldy – 7:6 (7:5).
Ekinshi sette esep 3:3 bolǵan mezette Býblıktiń bosańsyǵanyn paıdalanǵan Karreno-Býsta breık jasap ketti. Ol sol basymdylyǵynan aıyryla qoıǵan joq – 6:4.
Úshinshi, sheshýshi setti bastaǵan A.Býblık qarsylasynyń breık jasaýyna múmkindik bermedi. Aqyry chempıondyq match taǵdyry taı-breıkte sheshildi. Munda Pablo birden qos mınıbreık jasap, 4:0 esebimen alǵa ketti. Ári qaraı senimdi oınaǵan ol jeńisti ýysynan shyǵarǵan joq – 7:6 (7:3).
Tartysty báseke 2 saǵat 8 mınýtqa sozyldy.
Jalpy, ıspanııalyq sportshy match barysynda dopty jaqsy bere alatynyn kórsetse, tartys Býblıktiń geımderinde kóbirek órbidi. Keıbir urymtal sátterde qazaqstandyq tennısshiniń eısteri kómekke keldi. Biraq jeńis úshin bul jetkiliksiz boldy.
Osylaısha A.Býblık júlde qory 1,2 mln AQSh dollarynan asatyn týrnırdiń fınalynda utylyp qaldy.
Eske sala keteıik, budan buryn ıÝlııa Pýtıntsevanyń Beıjińde álemniń 1-raketkasymen kezdesetinin jazǵan bolatynbyz.
