Tennısshi Novak Djokovıchtiń dáýiri aıaqtaldy ma

ASTANA. KAZINFORM – «Úlken dýlyǵa» týrnırleri ishinde álemdegi eń baıyrǵy jarys bolyp esepteletin Ýımbldon márege taıalyp keledi.

1877 jyldan beri uıymdastyrylyp kele jatqan tennıs dodasynda bıyl erler arasynda fınalǵa álemniń birinshi jáne ekinshi raketkalary, 23 jastaǵy ıtalııalyq ıAnnık Sınner men odan bir jasqa kishiligi bar ıspanııalyq Karlos Alkaras shyqty.

Osylaısha, bıylǵy Rolan Garros týrnıriniń fınaly qaıtalanyp otyr. Onda bes setke sozylǵan asa tartysty matchta K.Alkaras kambek jasap, ıA.Sınnerdi utqan edi.

Ýımbldonda jartylaı fınalda ıA.Sınner «Úlken dýlyǵa» týrnırleriniń 24 dúrkin chempıony, serbııalyq Novak Djokovıchti 6:3, 6:3, 6:4 esebimen qapy qaldyrdy.

Italııalyq sportshy N.Djokovıchti qatarynan bes ret utqan tennıs tarıhyndaǵy ekinshi sportshy atandy. Buǵan deıin osyndaı nátıjege 2008-2009 jyldary ıspanııalyq, «Úlken dýlyǵada» 22 ret úzdik atanǵan Rafael Nadal jetken edi.

Sonymen qatar Sınner Djokovıchten toǵyz set qatarynan aılasyn asyryp, rekord ornatty. Burynǵy úzdik nátıje shveıtsarııalyq, «Úlken dýlyǵa» týrnırleriniń 20 dúrkin chempıony Rodjer Federerge tıesili edi. Ol 2006 jyly Monte-Karlo men 2007 jylǵy Dýbaı jarysyna deıingi aralyqta Djokovıchti segiz set qatarynan jeńgen edi.

Sóıtip London tórinde jeti ret úzdik shyqqan 38 jastaǵy N.Djokovıchtiń taǵy bir úmiti úzildi.

Serbııalyq sportshy Ýımbldonda 2011 jyly alǵash ret chempıon atanǵan kezde ıA.Sınner on jasqa tolmaǵan edi.

Tennıs mamandarynyń paıymdaýynsha, Novaktyń ózinen áldeqaıda jas ıA.Sınner men K.Alkaraspen taıtalasýy qıyndap bara jatyr. Bıyl Rolan Garrosta da Djokovıchti Sınner toqtatty.

Al ótken jyly Ýımbldon fınalynda K.Alkaras serbııalyq tennısshini 6:2, 6:2, 7:6 (7:4) esebimen jeńgen bolatyn.

Degenmen N.Djokovıch Ýımbldonǵa taǵy da kem degende bir ret oralatynyn málimdedi.

«Úlken dýlyǵa» dodalarynda qatarynan tórtinshi ret fınalǵa shyqqan ıA.Sınner Ýımbldonda alǵash ret chempıondyq ataq úshin talasady.

Serbııalyq tennısshi fınalda K.Alkarasty favorıt retinde esepteıtinin jetkizdi. Biraq ıA.Sınner ekeýiniń oıyn deńgeıi shamalas.

Áıelder arasynda álemniń 4-raketkasy, «Úlken dýlyǵa» týrnıriniń bes dúrkin chempıony, Polsha ókili Iga Shventek pen reıtıngide 12-orynda turǵan amerıkalyq, orys emıgranttarynyń qyzy Amanda Anısımova búgin fınalda oınaıdy. Olardyń qaısysy úzdik shyqsa da, óz sporttyq jolynda alǵash ret Ýımbldonda jeńimpaz atanbaq.

Keıingi kezde sátsiz óner kórsetip, álemdik reıtıngide kóshbasshylyq rólden aıyrylyp qalǵan I.Shventek babyna qaıta kelgendeı. Ol sońǵy básekede favorıt esebinde bolmaq. Degenmen jartylaı fınalda álemniń 1-raketkasy, belorýssııalyq Arına Sobolenkony súrindirgen A.Anısımova ońaı shaǵylatyn jańǵaq emes. Ol sporttyq jolynda birinshi ret «Úlken dýlyǵa» dodasynyń fınalynda oınaǵaly otyr.

Ýımbldonda favorıtterdiń qatarynda atalǵan 2022 jylǵy chempıon, qazaqstandyq Elena Rybakına úshinshi aınalymda kútpegen jerden danııalyq Klara Taýsonnan utylyp qaldy. Eger odan ótkende, tórtinshi aınalymda I.Shventekpen kezdesetin edi.

Ótken jyly jartylaı fınalǵa deıin jetken E.Rybakına WTA Live reıtıngisinde 11-den 13-orynǵa syrǵyp tur.

Sol sekildi alǵashqy aınalymnan asa almaǵan Aleksandr Býblık 31-den 34-satyǵa yǵysady.

Jasóspirimder arasynda juptyq synda jartylaı fınalǵa deıin jetken 17 jastaǵy Ámir Omarhanovty aıtpaǵanda, qazaqstandyqtar jyldyń basty dodalarynyń birinde sátsiz óner kórsetti.

Eske sala keteıik, budan buryn Ámir Omarhanovtyń Ýımbldon týrnıriniń fınalynan tys qalǵanyn jazǵan edik.